Eisteddfod y Garreg Las yn dechrau y penwythnos hwn

3 diwrnod yn ôl

Mae'r Eisteddfod Genedlaethol yn dechrau y penwythnos hwn ac mae disgwyl i dros 150,000 o bobl ymweld â Llantwd i ddathlu gŵyl iaith a diwylliant fwyaf Cymru.

Mae'r Eisteddfod yn cael ei chynnal yn ardal y Garreg Las eleni, sydd wedi'i henwi ar ôl y garreg las leol unigryw. Mae'r dalgylch yn ymestyn dros dair ardal — Sir Benfro, de Ceredigion, a gorllewin Sir Gâr. Bydd yr ardal hon yn dathlu cymeriad, diwylliant ac atyniadau unigryw'r tair sir drwy raglen gyffrous o gerddoriaeth fyw, arddangosiadau, sgyrsiau, gweithgareddau i blant a phrofiadau rhyngweithiol drwy gydol yr wythnos.

Mae Cyngor Sir Caerfyrddin yn gweithio'n agos gyda Chyngor Sir Ceredigion a Chyngor Sir Penfro yn ardal Pentre'r Garreg Las ar y Maes. Gall y rhai sy'n ymweld â Phentre'r Garreg Las edrych ymlaen at amrywiaeth o ddigwyddiadau a gweithgareddau sy'n arddangos y gorau o Sir Gâr, gan gynnwys:

 

Pwy

Pryd

Beth fydd yn digwydd

Y Cardi Bach

Dydd Sadwrn, 1 Awst, 2pm

Camwch yn ôl mewn amser gydag Emyr Phillips wrth iddo gyflwyno stori'r Cardi Bach, sef y rheilffordd oedd yn cysylltu Hendy-gwyn ar Daf ac Aberteifi ac yn chwarae rhan hanfodol ym mywyd cymunedau lleol am genedlaethau.

Plant y Garreg Las

Dydd Sul, 2 Awst, 11am

Perfformiad o'r gân “Croeso i Fro'r Garreg Las” gan bobl ifanc o 50 o ysgolion cynradd ar draws Sir Benfro, Sir Gâr a Cheredigion. 

 

Sioe Deuluol Amgueddfa Wlân Cymru

Dydd Sul, 2 Awst, 3pm

Dewch i glywed straeon diddorol am ddiwydiant gwlân Cymru a dysgu mwy am y bobl, y traddodiadau a'r dreftadaeth sy'n rhan o un o ddiwydiannau pwysicaf y genedl.

 

Wes wes weth!

Dydd Llun, 3 Awst, 12pm

Bydd gwesteion o'r tair sir yn trafod eu gwahaniaethau tafodieithol.

Blas o'r Fro

Dydd Mawrth, 4 Awst, 4pm

Ymunwch â Carwyn Graves i glywed y straeon a dysgu am y traddodiadau a'r cynnyrch sy'n rhoi blas unigryw i ardal y Garreg Las. Mae'r digwyddiad hwn yn cael ei gefnogi drwy Gynllun Grantiau Bach - Gwyliau a Digwyddiadau Bwyd a Diod Llywodraeth Cymru.

 

Ein Hafonydd, Ein Môr, Ein Data

Dydd Mercher, 5 Awst, 3pm

Monitro afonydd gorllewin Cymru dan arweiniad y gymuned leol.

Blas o'r Fro gyda Lisa Fearn

Dydd Mercher 5 Awst, 1pm a 4pm

Cyfle i fwynhau arddangosiad coginio byw gan Lisa Fearn. Dewch i ddysgu am flasau lleol, syniadau newydd a'r straeon y tu ôl i'r cynhwysion sy'n gwneud ardal y Garreg Las mor arbennig.

Mae'r digwyddiad hwn yn cael ei gefnogi drwy Gynllun Grantiau Bach - Gwyliau a Digwyddiadau Bwyd a Diod Llywodraeth Cymru.

 

Y Llanw 

Dydd Gwener 7 Awst, 9:30am a 4:30pm

Dewch i wylio perfformiad byw egnïol gan fand o Ysgol Bryngwyn, Llanelli.

 

Llesiant yn ardal y Garreg Las

Dydd Gwener 7 Awst, 2pm 

Ymunwch â chynrychiolwyr o Fwrdd Gwasanaethau Cyhoeddus y tair sir fydd yn cael trafodaeth am lesiant ar draws y rhanbarth. 

 

Mae amserlen lawn o weithgareddau a chystadlaethau sy'n cael eu cynnal drwy gydol yr wythnos ar gael ar wefan Eisteddfod Genedlaethol Cymru: Rhaglen | Eisteddfod

Trafnidiaeth gyhoeddus i'r Maes:

Bydd Trafnidiaeth Cymru yn rhedeg bysiau gwennol rheolaidd i’r Maes o orsaf Caerfyrddin. Gwasanaeth bws gwennol am ddim fydd hwn a bydd y bysiau yn addas ar gyfer defnyddwyr cadeiriau olwyn.

Eleni, gallwch chi ddefnyddio gwasanaeth bws TrawsCymru T5 yn uniongyrchol i'r Eisteddfod yn Llantwd o Aberteifi neu Abergwaun. I ddefnyddio'r gwasanaeth hwn, mae gwasanaeth bws 460 yn darparu cyswllt rhwng Caerfyrddin ac Aberteifi drwy Gastellnewydd Emlyn o ddydd Llun i ddydd Sadwrn. Bydd angen newid bws yn Aberteifi i deithio ymlaen i'r Maes ar wasanaeth T5 neu ar y Bws Gwennol.

Os byddwch chi'n teithio mewn car, gwnewch yn siŵr eich bod chi'n dilyn arwyddion melyn yr Eisteddfod i gyrraedd y Maes.

I gael rhagor o wybodaeth am sut i gyrraedd y Maes, ewch i wefan yr Eisteddfod.

Dywedodd y Cynghorydd Linda Evans, Arweinydd Cyngor Sir Caerfyrddin:

Rydyn ni'n hynod falch o fod yn rhan o'r Eisteddfod Genedlaethol eleni. Mae hwn yn gyfle gwych i ddathlu'r iaith Gymraeg, diwylliant Cymru a'n cymunedau wrth arddangos Sir Gâr. Byddwn i'n annog pawb i ymweld â'r Eisteddfod a phrofi popeth sydd ganddi i'w gynnig”.

I gael rhagor o wybodaeth am yr Eisteddfod, ewch i'n gwefan.