Dweud eich dweud ar Fap Rhwydwaith Teithio Llesol Sir Gaerfyrddin

Mae Cyngor Sir Caerfyrddin yn diweddaru ei Fap Rhwydwaith Teithio Llesol (ATNM), ac mae trigolion yn cael eu hannog i ddweud eu dweud.

Mae'r map yn nodi'r llwybrau cerdded, olwyno a beicio presennol ar draws y sir, ynghyd â gwelliannau arfaethedig, awgrymiadau a llwybrau y bydd y Cyngor Sir yn ceisio eu datblygu a'u gweithredu dros y 15 mlynedd nesaf.

Gwahoddir trigolion i roi adborth ar y llwybrau a'r ychwanegiadau awgrymedig fel y nodir ar y map. Ni fyddwn yn gallu ystyried ymhellach unrhyw lwybrau nad ydynt wedi'u cynnwys ar y map, gan mai dim ond y llwybrau sydd ar y map fydd yn gymwys i gael cyllid posibl gan Lywodraeth Cymru neu ffynonellau eraill yn y dyfodol.

Dewch draw i sesiwn galw heibio anffurfiol i drafod y Diweddariad ATNM, gofyn cwestiynau a rhoi adborth rhwng 2pm a 6pm ar:

•    21 Medi 2026 yn Llyfrgell Llanelli
•    22 Medi 2026 yn Llyfrgell Caerfyrddin
•    24 Medi 2026 yn Llyfrgell Rhydaman

Fel arall, dywedwch eich dweud ar-lein drwy wefan Cyngor Sir Caerfyrddin neu e-bostiwch. Bydd yr ymgynghoriad yn gorffen ar 26 Hydref 2026.

Gallwch ofyn am gopïau papur o'r ymgynghoriad yng Nghanolfannau Hwb y Cyngor Sir yn Rhydaman, Caerfyrddin neu Lanelli.

Dywedodd y Cynghorydd Edward Thomas, Aelod Cabinet Cyngor Sir Caerfyrddin dros Wasanaethau Trafnidiaeth, Gwastraff a Seilwaith: 

Bydd y Map Rhwydwaith Teithio Llesol yn helpu i lunio sut rydyn ni'n gwella ac yn ehangu cyfleoedd cerdded, olwyno a beicio ledled Sir Gaerfyrddin dros y blynyddoedd i ddod. Mae'r map yn nodi llwybrau presennol yn ogystal â chysylltiadau arfaethedig yn y dyfodol, ond mae'n hanfodol ein bod yn clywed yn uniongyrchol gan drigolion, busnesau a grwpiau cymunedol i sicrhau ei fod yn adlewyrchu anghenion a blaenoriaethau lleol."