Rhybuddion am deganau peryglus

Mae tîm Safonau Masnach Cyngor Sir Caerfyrddin yn annog preswylwyr i fod yn ofalus wrth brynu teganau squishy neu squeezy poblogaidd ar ôl darganfod cynhyrchion ffug anniogel sy'n cael eu gwerthu yn y sir.

Mae'r rhybudd yn dilyn y llu o ddoliau Labubu ffug y llynedd ac mae nawr yn canolbwyntio ar nifer gynyddol o deganau tebyg i beli straen, gan gynnwys fersiynau ffug o frandiau adnabyddus fel NeeDoh. Mae llawer o'r cynhyrchion hyn yn groes i ddeddfau diogelwch cynnyrch a nodau masnach.

Mae swyddogion Safonau Masnach wedi tynnu nifer o deganau squeezy dumpling – sy'n aml yn cael eu gwerthu mewn basgedi stemar plastig – o siopau ledled Sir Gaerfyrddin. Mae profion cynhyrchion tebyg gan awdurdodau lleol ledled Cymru a'r DU wedi datgelu pryderon diogelwch difrifol.

Nododd yr ymchwiliadau nifer o beryglon, gan gynnwys:

• Cemegion peryglus : mae rhai cynhyrchion yn cynnwys lefelau gormodol o gemegion gwenwynig, gan gynnwys bensen, sy'n gallu llidio'r croen, y llygaid a'r ysgyfaint.
• Gwybodaeth ddiogelwch ar goll: roedd llawer o deganau heb fod â'r rhybuddion diogelwch sy'n ofynnol dan y gyfraith, cyfyngiadau oedran, manylion y mewnforiwr i'r DU a'r marciau cydymffurfiaeth UKCA neu CE gorfodol.
• Arogleuon cemegol cryf : mae cynhyrchion nad ydynt yn cydymffurfio yn aml yn rhoi arogl synthetig cryf neu arogl tebyg i betrol, a allai nodi presenoldeb sylweddau niweidiol.
• Risgiau llosgi a ffrwydro: mae tuedd bryderus ar y cyfryngau cymdeithasol wedi annog plant i gynhesu'r teganau hyn mewn microdonnau. Mae sawl achos wedi arwain at blant yn dioddef llosgiadau difrifol ar ôl i'r teganau byrstio, gan ryddhau gel berwedig, gludiog sy'n glynu wrth y croen.

Dywedodd y Cynghorydd Aled Vaughan Owen, Aelod Cabinet Cyngor Sir Caerfyrddin sy'n gyfrifol am Safonau Masnach:

Dylai rhieni a gofalwyr gymryd gofal ychwanegol wrth brynu teganau, yn enwedig y rhai sy'n boblogaidd ar y cyfryngau cymdeithasol ar hyn o bryd neu sy'n cael eu gwerthu am brisiau anarferol o isel. Gall teganau ffug edrych yn argyhoeddiadol ond gallan nhw beri risgiau difrifol i iechyd a diogelwch plant. Rydyn ni'n annog unrhyw un sydd wedi prynu un o'r cynhyrchion hyn i wneud ychydig o wiriadau syml a rhoi'r gorau i'w defnyddio ar unwaith os oes unrhyw bryderon.

Mae Safonau Masnach yn cynghori defnyddwyr i wneud y canlynol:

• Gwiriwch fod teganau yn arddangos y marciau UKCA neu CE gofynnol, ynghyd ag enw a chyfeiriad y gwneuthurwr neu'r mewnforiwr i'r DU.
• Stopiwch ddefnyddio'r tegan ar unwaith os yw'n gollwng, os oes ganddo arogl cemegol cryf, os yw wedi'i wneud yn wael neu os nad oes gwybodaeth am ddiogelwch arno.
• Peidiwch byth â rhoi'r teganau hyn mewn microdon na chaniatáu i blant eu rhoi yn eu ceg.

Mae rhagor o wybodaeth am y peryglon a'r cynhyrchion sy'n cael eu galw'n ôl ar hyn o bryd ar gael drwy GOV.UK Product Recall: Squeezy Dumplings Alert.

Gall unrhyw un sydd â phryderon am y cynhyrchion hyn gysylltu â'r Gwasanaeth Defnyddwyr Cyngor ar Bopeth ar 0808 223 1133.

Dylai busnesau sydd angen cyngor gysylltu â Safonau Masnach Cyngor Sir Caerfyrddin drwy ffonio 01267 234567.