Ymestyn ystod oedran pedair ysgol gynradd yn Sir Gaerfyrddin

Yn ei gyfarfod o'r Cyngor Llawn heddiw (dydd Mercher 10 Mehefin 2026), mae Cyngor Sir Caerfyrddin wedi cytuno i ehangu mynediad at addysg blynyddoedd cynnar drwy newid ystod oedran pedair ysgol gynradd yn y sir o 4-11 i 3-11 oed.

Bydd y newidiadau yn golygu gall plant gael mynediad yn dair oed at addysg feithrin ran-amser wedi'i hariannu, a hynny mewn ardaloedd lle mae'r ddarpariaeth bresennol yn gyfyngedig, yn Ysgol y Ddwylan, Ysgol Cwrt Henri, Ysgol Gymraeg y Tymbl, ac Ysgol Llanybydder.

Er mwyn ateb y galw am addysg feithrin ran-amser a gofal plant cofleidiol mewn ardaloedd lle mae'r ddarpariaeth nas cynhelir yn gyfyngedig, caiff yr ysgolion hyn eu hailddynodi yn ysgolion 3-11. Bydd hyn yn caniatáu iddynt gynnig o leiaf 10 awr yr wythnos o addysg blynyddoedd cynnar ran-amser anstatudol i helpu i fynd i'r afael ag unrhyw fylchau yn y ddarpariaeth a sicrhau mynediad tecach at addysg blynyddoedd cynnar ledled y sir.

Mae'r penderfyniad hwn yn dilyn cyfnod ymgynghori ffurfiol gyda disgyblion, rhieni, athrawon, llywodraethwyr a chymuned ehangach yr ysgolion rhwng 4 Medi a 16 Hydref 2025.

Dywedodd y Cynghorydd Glynog Davies, Aelod Cabinet Cyngor Sir Caerfyrddin dros Addysg: 

Bydd y penderfyniad hwn heddiw yn helpu i sicrhau bod gan holl blant Sir Gâr fynediad teg a chyfartal at addysg blynyddoedd cynnar, ta ble maen nhw'n byw. Hefyd bydd yn cynyddu'r addysg feithrin ran-amser a'r gofal plant cofleidiol sydd ar gael yn yr ardaloedd hyn.”