Llwybr Dyffryn Tywi newydd i gynnal hanner marathon cyntaf

Mae tocynnau bellach ar werth ar gyfer Hanner Marathon cyntaf erioed Llwybr Dyffryn Tywi, a gynhelir ddydd Sul 16 Awst 2026.

Wedi'i threfnu gan Dîm Cymunedau Chwaraeon a Hamdden Actif Cyngor Sir Caerfyrddin, mae'r ras yn cynnig golygfeydd eiconig o bob rhan o Ddyffryn Tywi yn Sir Gaerfyrddin, gan ddilyn Llwybr Dyffryn Tywi a gwblhawyd yn ddiweddar.

Bydd y ras yn dechrau am 9am, gan ddechrau bob yn dipyn i sicrhau diogelwch y cyfranogwyr. Bydd yn dechrau yn Ysgol Bro Dinefwr yn Ffair-fach, gan ddilyn y llwybr i'r pwynt hanner ffordd ychydig ar ôl Llanarthne ac yn ôl.

Gallwch chi nawr gofrestru ar wefan Actif a'r pris mynediad cyffredinol yw £30 yn unig.
Yn addas i redwyr o bob gallu, mae'r llwybr hanner marathon di-draffig hwn yn cynnig cyfle unigryw i redwyr profiadol rasio ochr yn ochr â dechreuwyr drwy un o dirweddau mwyaf prydferth Sir Gaerfyrddin.

Gyda chymorth gwirfoddolwyr, bydd gorsafoedd dŵr a thoiledau ar hyd cwrs y llwybr, yn ogystal â gweithgareddau i blant a phrofiadau i deuluoedd wedi'u darparu gan Dîm Cymunedau Actif.

Dywedodd y Cynghorydd Hazel Evans, Aelod Cabinet Cyngor Sir Caerfyrddin dros Adfywio, Hamdden, Diwylliant a Thwristiaeth:

“Mae'r digwyddiad hwn yn ddathliad perffaith o Lwybr newydd Dyffryn Tywi, a dyma'r cyntaf o lawer o gyfleoedd newydd y bydd yn dod i'r ardal. Drwy sefydlu'r llwybr diogel a hygyrch hwn drwy un o rannau mwyaf eiconig a hardd y sir, rydyn ni'n buddsoddi nid yn unig yn iechyd yr economi leol, ond yn iechyd pobl leol.”

Gallwch chi weld manylion am gofrestru, yn ogystal â rhagor o wybodaeth a chwestiynau cyffredin am y ras drwy fynd i Hanner Marathon Llwybr Dyffryn Tywi.