Arhoswch yn ddiogel o amgylch dŵr yn ystod tywydd poeth
1 diwrnod yn ôl
Gan fod nifer o ysgolion wedi gwneud y penderfyniad i gau oherwydd gwres eithafol heddiw ac yfory, 24 a 25 Mehefin 2026, mae Cyngor Sir Caerfyrddin yn annog pobl ifanc, rhieni preswylwyr ac ymwelwyr i gymryd gofal ychwanegol o amgylch afonydd, llynnoedd, cronfeydd dŵr, traethau a lleoliadau dŵr agored eraill. Er gwaethaf tymheredd uchel, mae tymheredd y dŵr yn parhau i fod yn sylweddol oerach a gall sbarduno sioc dŵr oer, a all effeithio ar unrhyw un, waeth beth fo'u hoedran neu eu gallu nofio.
Gall sioc dŵr oer achosi anadl anwirfoddol, anadlu cyflym a phanig, gan ei gwneud hi'n anodd aros ar wyneb y dŵr neu nofio i ddiogelwch. Gall ddigwydd o fewn eiliadau o fynd i mewn i'r dŵr ac mae'n un o'r prif ffactorau mewn boddi damweiniol.
Gall cyrff dŵr naturiol gynnwys peryglon cudd, gan gynnwys ceryntau cryf, rhwystrau tanddwr, disgyniadau serth a newidiadau sydyn mewn dyfnder. Gall cronfeydd dŵr a chwareli fod yn arbennig o beryglus, gan fod y dŵr yn aml yn parhau i fod yn oer iawn trwy gydol y flwyddyn.
Anogir preswylwyr i ddilyn cyngor diogelwch dŵr syml:
- Peidiwch byth â neidio na phlymio i mewn i ddŵr agored.
- Ewch i mewn i'r dŵr yn araf ac yn ofalus os ydych chi'n cymryd rhan mewn gweithgaredd trefnus.
- Peidiwch byth â nofio ar eich pen eich hun.
- Osgowch alcohol cyn neu yn ystod unrhyw weithgaredd yn y dŵr.
- Dewiswch draethau lle mae yna achubwyr bywyd neu leoliadau sy'n cael eu goruchwylio lle bo'n bosibl.
- Dylid goruchwylio plant o amgylch dŵr bob amser.
- Os ydych chi'n syrthio i ddŵr oer yn annisgwyl, cofiwch "Arnofio i Fyw" – rhowch eich pen yn ôl, gan gadw eich clustiau yn y dŵr, ymlaciwch a cheisiwch anadlu'n normal a galwch am help ar ôl i chi dawelu.
Os ydych chi'n gweld rhywun mewn trafferthion yn y dŵr, ffoniwch 999 ar unwaith. Peidiwch â mynd i mewn i'r dŵr i geisio ei achub.
Mae'r Cyngor Sir hefyd yn annog rhieni a gofalwyr i siarad â phlant a phobl ifanc am y peryglon o fynd i mewn i afonydd, llynnoedd, cronfeydd dŵr a safleoedd dŵr eraill heb oruchwyliaeth yn ystod cyfnodau o dywydd poeth.
Dywedodd y Cynghorydd Linda Evans, Arweinydd Cyngor Sir Caerfyrddin:
“Rydyn ni eisiau i bawb fwynhau'r tywydd twym yn ddiogel. Gall ychydig o ragofalon syml wneud gwahaniaeth enfawr, a byddwn yn annog preswylwyr, ymwelwyr, rhieni a gofalwyr i gymryd eiliad i ymgyfarwyddo â'r cyngor diogelwch dŵr cyn mynd i mewn i'r dŵr”.
