Ceisio Cadeirydd i arwain rhaglen adfywio Balchder mewn Lle newydd Llanelli

Mae Cyngor Sir Caerfyrddin yn gwahodd datganiadau o ddiddordeb i fod yn Gadeirydd Bwrdd Cymdogaeth newydd Llanelli, ar ôl i Lanelli gael ei gynnwys yn Rhaglen Balchder mewn Lle Llywodraeth y DU.

Gan ganolbwyntio ar ran ddaearyddol benodol o Lanelli, mae'r ardal yn un o blith pedair yng Nghymru a ddewiswyd ar gyfer y rhaglen adfywio a grymuso cymunedol hirdymorhon, a fydd yn darparu hyd at £20 miliwn o fuddsoddiad dros 10 mlynedd. Bydd y cyllid yn cefnogi prosiectau trawsnewidiol, a arweinir gan y gymuned sy'n meithrin balchder, cyfle a gwytnwch hirdymoryn yr ardal.

Bydd y Cadeirydd yn chwarae rhan ganolog wrth lunio effaith y Rhaglen Balchder mewn Lle sy'n cynnwys: penodi ac arwain y Bwrdd Cymdogaeth; darparu arweinyddiaeth glir, gynhwysol a thryloyw, gweithio'n adeiladol gyda Chyngor Sir Caerfyrddin a sicrhau bod penderfyniadau'n cael eu harwain gan y gymuned, yn deg ac yn cyd-fynd ag anghenion lleol.

Bydd y Bwrdd Cymdogaeth yn dod â thrigolion, busnesau lleol, sefydliadau ar lawr gwlad a chynrychiolwyr etholedig ynghyd i wneud penderfyniadau ar sut mae cyllid yn cael ei fuddsoddi, gan sicrhau ei fod yn adlewyrchu blaenoriaethau lleol ac yn cyflawni effaith barhaol.

Bydd y Bwrdd yn arwain buddsoddiad mewn mentrau gan gynnwys:

·       Adnewyddu'r stryd fawr a gwelliannau i'r strydlun

·       Sicrhau bod mannau cyhoeddus yn fwy diogel, yn wyrddach ac yn fwy croesawgar

·       Cyfleusterau chwarae, diwylliannol a chymunedol

·       Tai a pherchnogaeth asedau dan arweiniad y gymuned

·       Mentrau cymdeithasol a busnesau cydweithredol

Dywedodd y Cynghorydd Hazel Evans, Aelod Cabinet Cyngor Sir Caerfyrddin dros Adfywio, Hamdden, Diwylliant a Thwristiaeth:

Rwy'n falch iawn y bydd ardaloedd Llanelli yn elwa ar y rhaglen Balchder mewn Lle, gyda swyddogion Cyngor Sir Caerfyrddin yn cefnogi'r gymuned a fydd yn arwain ar y buddsoddiadau hyn i ddarparu ystod eang o fanteision i'r ardal leol. 

Oherwydd natur hyblyg a hirdymor y rhaglen, bydd hyn yn galluogi cymunedau i ymateb i anghenion newidiol a sicrhau bod unrhyw fuddsoddiad yn darparu'r budd mwyaf posibl i'r gymuned."

Dywedodd y Fonesig Nia Griffiths AS:

“Mae'r rhaglen Balchder mewn Lle hon yn gyfle gwirioneddol i ni ddod at ein gilydd fel cymuned ac i bawb sy'n byw neu'n gweithio yng nghanol y dref neu'n agos at ganol y dref, neu sy'n dod i'r dref neu a hoffai gael mwy o reswm i ddod i'r dref, i ddweud eu dweud am sut yr hoffent wella Llanelli, a'n helpu ni i lunio cynllun ar gyfer y deng mlynedd nesaf. Byddwn yn dod atoch cyn bo hir gyda mwy o fanylion am gymryd rhan. Yn y cyfamser, a fyddech cystal â meddwl am berson y gallem ei annog i ymgymryd â rôl heriol y Cadeirydd...nid gwleidydd na'r 'bobl arferol'.. rhywun sydd ag egni a brwdfrydedd dros Lanelli, rhywun y gallwn ni i gyd ei gefnogi, rhowch anogaeth i'r person hynny i gyflwyno ei enw.”

Ewch i wefan Cyngor Sir Caerfyrddin i gael rhagor o wybodaeth am raglen Balchder mewn Lle Llanelli a sut i wneud cais am rôl y Cadeirydd.