Fforwm Landlordiaid Preifat Sir Gaerfyrddin yn dod â landlordiaid ac arbenigwyr tai ynghy

5 awr yn ôl

Daeth landlordiaid preifat o bob cwr o'r sir at ei gilydd yng Nghlwb Rygbi Athletig Caerfyrddin ddydd Mawrth, 3 Tachwedd 2026, ar gyfer Fforwm diweddaraf Landlordiaid Preifat Sir Gaerfyrddin, digwyddiad a gynlluniwyd i ddarparu diweddariadau, arweiniad a chefnogaeth ymarferol i'r rhai sy'n gweithredu yn y sector rhentu preifat.

Daeth y fforwm â landlordiaid, gweithwyr proffesiynol tai ac arbenigwyr diwydiant ynghyd i drafod materion cyfredol sy'n effeithio ar y sector, newidiadau i ddeddfwriaeth ac arferion gorau mewn rheoli eiddo.

Agorwyd y noson a'i harwain gan David Crane, Cadeirydd Fforwm Landlordiaid Sir Gaerfyrddin, a groesawodd y mynychwyr a thynnodd sylw at bwysigrwydd cynnal cysylltiadau cryf rhwng landlordiaid a sefydliadau sy'n cefnogi'r sector rhentu preifat.

Clywodd y rhai a oedd yn bresennol neges hefyd gan y Cynghorydd Emlyn Schiavone, Aelod Cabinet Cyngor Sir Caerfyrddin dros Gartrefi, a oedd yn cydnabod y cyfraniad pwysig y mae landlordiaid preifat yn ei wneud wrth ddarparu cartrefi i drigolion ledled y sir gan bwysleisio’r gwerth o weithio mewn partneriaeth i helpu i gynnal safonau uchel yn y sector.

Rhannodd nifer o siaradwyr gwadd eu gwybodaeth a'u harbenigedd drwy gydol y digwyddiad, gan gynnwys:

  • Gillian Owens o Gymdeithas Genedlaethol Landlordiaid Preswyl, a rannodd fewnwelediadau cenedlaethol a thrafod materion allweddol sy'n effeithio ar landlordiaid preifat ar hyn o bryd.
  • Bethan Jones, Rheolwr Gweithredol Rhentu Doeth Cymru, a roddodd y wybodaeth ddiweddaraf i landlordiaid gan Rhentu Doeth Cymru.
  • Debbie Jenkins o Gyfreithwyr Jennings, a ddarparodd gyngor cyfreithiol ymarferol ac arweiniad i helpu landlordiaid i lywio eu cyfrifoldebau a'u rhwymedigaethau.

Dywedodd y Cynghorydd Emlyn Schiavone, Aelod Cabinet dros Gartrefi:

‘Mae landlordiaid preifat yn chwarae rôl bwysig wrth helpu i ddiwallu'r galw am dai ledled Sir Gaerfyrddin. Mae digwyddiadau fel Fforwm y Landlordiaid yn darparu cyfleoedd gwerthfawr i landlordiaid gael cyngor arbenigol, y wybodaeth ddiweddaraf am ddatblygiadau yn y sector a rhannu profiadau gydag eraill. Trwy weithio gyda'n gilydd, gallwn barhau i gefnogi'r gwaith o ddarparu cartrefi diogel sy'n cael eu rheoli'n dda i denantiaid lleol.’