Y grant ynni adnewyddadwy cymunedol cyntaf wedi'i ddyfarnu i Siop Gymunedol Dryslwyn

Mae'n bleser gan Gyngor Sir Caerfyrddin gyhoeddi bod y prosiect cyntaf a ariennir drwy'r rhaglen Grant Ynni Adnewyddadwy Cymunedol bellach wedi'i gymeradwyo, gan nodi carreg filltir bwysig yn ymdrechion y sir i gefnogi prosiectau effeithlonrwydd ynni a chynaliadwyedd dan arweiniad y gymuned.

Mae diddordeb yn y gronfa wedi bod yn eithriadol o gryf, gyda galw sylweddol gan sefydliadau cymunedol ledled y rhanbarth ers i geisiadau agor yn gynharach yn yr haf.

Mae'r ymgeisydd llwyddiannus cyntaf, Siop Gymunedol Dryslwyn, wedi sicrhau cyllid i osod mesurau effeithlonrwydd ynni yn ei safle cymunedol newydd. Bydd y prosiect yn helpu i sicrhau bod yr adeilad yn gweithredu mor effeithlon â phosibl o'r cychwyn cyntaf, gan leihau'r defnydd o ynni a chostau gweithredu wrth gefnogi cynaliadwyedd hirdymor yr ased lleol gwerthfawr hwn, gan sicrhau y gall barhau i wasanaethu'r gymuned am flynyddoedd i ddod.

Sefydlwyd y rhaglen Grant Ynni Adnewyddadwy Cymunedol i helpu sefydliadau cymunedol i wella perfformiad ynni eu hadeiladau, lleihau allyriadau carbon a chryfhau gwydnwch yn erbyn costau ynni cynyddol.

Oherwydd y lefel uchel o ddiddordeb, mae'r cyllid cyfalaf a ddyrannwyd drwy'r rhaglen bellach wedi'i ymrwymo'n llawn. Fodd bynnag, mae cymorth ar gael o hyd drwy wasanaeth archwilio ynni am ddim ar gyfer adeiladau cymunedol ledled Sir Gaerfyrddin.

Mae'r archwiliadau yn rhoi dealltwriaeth fanwl i sefydliadau o'u defnydd o ynni, yn nodi cyfleoedd ar gyfer gwella effeithlonrwydd ac yn helpu i ddatblygu cynlluniau ymarferol i leihau'r defnydd o ynni a chostau.

Anogir grwpiau cymunedol sydd â diddordeb mewn derbyn cymorth i ddysgu rhagor a gwneud cais am archwiliad ynni am ddim trwy wefan y rhaglen.

Dywedodd y Cynghorydd Aled Vaughan Owen, Aelod Cabinet Cyngor Sir Caerfyrddin dros Newid Hinsawdd, Datgarboneiddio a Chynaliadwyedd:

Rydym wedi bod wrth ein bodd gan lefel y diddordeb yn y rhaglen Grant Ynni Adnewyddadwy Cymunedol ac rydym yn falch o weld mai Siop Gymunedol Dryslwyn yw'r prosiect cyntaf i elwa o'r cyllid hwn. Mae adeiladau cymunedol yn chwarae rhan hanfodol ym mywyd ein trefi a'n pentrefi, a bydd eu cefnogi i weithredu mesurau effeithlonrwydd ynni yn helpu i leihau costau, lleihau allyriadau a chryfhau eu cynaliadwyedd hirdymor."

Dywedodd y Cynghorydd Hazel Evans, Dirprwy Arweinydd Cyngor Sir Caerfyrddin a'r Aelod Cabinet dros Adfywio, Hamdden, Diwylliant a Thwristiaeth:

Mae Siop Gymunedol Dryslwyn yn dangos beth y gellir ei gyflawni pan fydd cymunedau'n dod at ei gilydd gyda gweledigaeth a rennir. Mae'r siop wedi dod yn ganolbwynt pwysig i breswylwyr lleol, ac mae cefnogi prosiectau fel hyn yn helpu i sicrhau bod ein cymunedau gwledig yn parhau i fod yn lleoedd bywiog i fyw, gweithio ac ymweld â nhw.

Rwy'n falch o weld y prosiect yn derbyn y cyllid hwn ac edrychaf ymlaen at weld yr effaith gadarnhaol y bydd yn ei chael ar bobl leol."

Mae'r rhaglen wedi bod yn bosibl drwy gyllid gan Gronfa Twf Lleol Cymru. Mae cymorth ychwanegol wedi cael ei ddarparu gan Ynni Sir Gâr, y gymdeithas ynni cymunedol a sefydlwyd gan y cyngor. Yn unol ag amcanion y gymdeithas, mae incwm a gynhyrchir trwy werthu trydan adnewyddadwy dros ben i'r Grid Cenedlaethol yn cael ei ail-fuddsoddi mewn prosiectau cymunedol. Mae'r cyllid hwn wedi helpu i ehangu effaith y rhaglen, gan alluogi buddsoddiad pellach mewn offer cyfalaf a chynyddu nifer y prosiectau cymunedol sy'n gallu elwa o fesurau effeithlonrwydd ynni.

I gael rhagor o wybodaeth ac i wneud cais am archwiliad ynni am ddim, ewch i wefan y Cyngor: https://www.sirgar.llyw.cymru/busnes/cyllid/grant-egni-adnewyddadwy-cymunedol-sir-gaerfyrddin/