Gwaith yn dechrau ar ddatblygiad tai newydd yn Llanymddyfri 

Mae gwaith adeiladu wedi dechrau ar ddatblygiad tai Cyngor newydd yn Heol Cilycwm, Llanymddyfri, gan nodi cam pwysig yn y gwaith o gynyddu'r cyflenwad o dai fforddiadwy yn yr ardal. 

Mae'r datblygiad yn rhan o raglen Cyngor Sir Caerfyrddin i gynyddu'r cyflenwad o dai Cyngor i helpu i fodloni'r anghenion am dai a nodwyd ledled y sir. Ar ôl cwblhau'r datblygiad, bydd y cynllun yn darparu tai Cyngor newydd i'w rhentu ar gyfer unigolion a theuluoedd yn yr ardal, a bydd y rhain yn cael eu dyrannu yn unol â Pholisi Gosodiadau Lleol. Bydd y cynllun yn cyfrannu at ddarparu tai modern, ynni-effeithlon, gan gefnogi datblygiad parhaus cymunedau cynaliadwy.

Wrth i'r gwaith ddechrau, mae Cyngor Sir Caerfyrddin yn annog trigolion lleol sydd â diddordeb yn y tai newydd hyn i sicrhau eu bod wedi'u cofrestru ar y gofrestr dai, gan fod hyn yn hanfodol i unrhyw un sy'n dymuno gwneud cais am dai fforddiadwy yn y sir.

Dylai'r tai Cyngor newydd fod ar gael o ddiwedd yr Haf / Hydref 2027. 

Dywedodd y Cynghorydd Emlyn Schiavone, Aelod Cabinet dros Gartrefi Cyngor Sir Caerfyrddin:

“Mae'n wych gweld bod y gwaith bellach wedi dechrau ar y datblygiad tai Cyngor newydd hwn yn Llanymddyfri. Bydd y cartrefi hyn y mae angen mawr amdanynt yn helpu i ddiwallu'r galw am dai lleol, yn darparu llety o ansawdd uchel ac ynni-effeithlon, ac yn cefnogi twf cymunedau cynaliadwy yn yr ardal. Byddwn yn annog unrhyw un sydd â diddordeb mewn cael mynediad i'r cartrefi hyn i sicrhau eu bod wedi'u cofrestru ar y gofrestr dai.”

Dywedodd y Cynghorydd Handel Davies, Cynghorydd Sir Llanymddyfri, "Mae'n braf gweld bod y prosiect hwn bellach ar waith ac rwy'n falch iawn bod Cyngor Sir Caerfyrddin yn adeiladu tai newydd yn Llanymddyfri".

I gael rhagor o wybodaeth am Gofrestr Tai Sir Gaerfyrddin a sut i wneud cais, ewch i: Dod o hyd i gartref i'w rentu - Cyngor Sir Caerfyrddin