Sir Gâr yn dathlu twf a buddsoddiad mewn twristiaeth yn ystod Wythnos Twristiaeth Cymru

Mae Cyngor Sir Gâr yn nodi Wythnos Twristiaeth Cymru 2025 (12–18 Mai) drwy ddathlu buddsoddiadau mawr, atyniadau newydd, ac effaith gynyddol twristiaeth ar economi a chymunedau'r sir.

Mae twristiaeth yn parhau i fod yn rhan hanfodol o economi Sir Gâr, gyda 3.31 miliwn o ymwelwyr yn cael eu croesawu yn 2023 ac effaith economaidd leol o £683.26 miliwn. Mae'n sbardun allweddol i gyflogaeth leol, datblygu busnes, a balchder diwylliannol - gan gefnogi cymunedau ledled y sir.

Mae buddsoddiad diweddar wedi cryfhau cynnig ymwelwyr Sir Gâr ymhellach. Ymysg y datblygiadau diweddaraf mae agor cwrs  gwallgolff 12 twll newydd sbon yn Caban Pentywyn, sy'n cynnig atyniad hwyliog a chyfeillgar i deuluoedd ar Draeth Pentywyn.

Carreg filltir bwysig arall yw lansio'r rhan gyntaf o Lwybr Dyffryn Tywi, llwybr golygfaol a gynlluniwyd ar gyfer cerddwyr, beicwyr a defnyddwyr cadeiriau olwyn. Mae'r darn 4 milltir sydd newydd agor yn rhedeg rhwng Abergwili a Nantgaredig, disgwylir i'r llwybr llawn 16.7 milltir gael ei gwblhau yn ddiweddarach eleni. Ar ôl i'r llwybr di-draffig gael ei orffen, bydd yn cysylltu Dyffryn Tywi â Ffairfach, gan ddarparu taith ddiogel a hygyrch drwy un o dirweddau mwyaf prydferth Sir Gâr.

Gyda chefnogaeth cronfa Y Pethau Pwysig Llywodraeth Cymru, mae Cyngor Sir Gâr hefyd wedi cyflawni cyfres o welliannau seilwaith i wella profiad cyffredinol yr ymwelwyr. Mae'r rhain yn cynnwys gwell mynediad at safleoedd treftadaeth allweddol fel Amgueddfa Caerfyrddin a Llansteffan. Yn ogystal, mae cyllid sylweddol wedi'i sicrhau ar gyfer prosiectau ym Mharc Gwledig Pen-bre a Chanolfan Gwlyptir Llanelli. Mae'r gwaith uwchraddio hwn wedi gwella cyfleusterau ar y safle ac wedi cryfhau cynaliadwyedd hirdymor.

I ddathlu Wythnos Twristiaeth Cymru, mae Cyngor Sir Gâr wedi lansio modiwl ffilmio lefel aur o fewn ei Gynllun Llysgenhadon Twristiaeth ar-lein am ddim. Mae'r modiwl hwn yn tynnu sylw at apêl gynyddol y sir fel cyrchfan ffilm a theledu. Mae hefyd yn cyflwyno'r canllaw Set-Jetters, gan helpu busnesau a phreswylwyr lleol i hyrwyddo lleoliadau ffilmio eiconig. Mae'r modiwl yn cefnogi ymgyrch Starring Great Britain gan VisitBritain, gyda'r nod o hybu twristiaeth sgrin ledled y DU.

Dywedodd y Cynghorydd Hazel Evans, Aelod Cabinet Cyngor Sir Gâr dros Adfywio, Hamdden, Diwylliant a Thwristiaeth:

Mae twristiaeth yn Sir Gâr yn cefnogi swyddi, yn sbarduno buddsoddiad, ac yn helpu i warchod y lleoedd unigryw sy'n gwneud ein sir yn arbennig. O atyniadau newydd i ymwelwyr i brosiectau dan arweiniad y gymuned, rydym yn falch o arddangos y gorau o'r hyn rydyn ni'n ei gynnig drwy gydol y flwyddyn.”

I ddysgu rhagor neu i gofrestru am y Cynllun Llysgenhadon Twristiaeth, ewch i:
https://www.sirgar.llyw.cymru/cartref/busnes/twristiaeth/llysgennad-twristiaeth-sir-gaerfyrddin/