Dathlu Wythnos Ymwybyddiaeth o Fyddardod 2025

Yr Wythnos Ymwybyddiaeth o Fyddardod hon, mae Cyngor Sir Caerfyrddin yn ymuno â chymunedau ledled y DU i gydnabod a dathlu diwylliant, iaith a phrofiadau cyfoethog plant byddar, pobl ifanc fyddar a'u teuluoedd. Mae thema eleni, "Tu Hwnt i Dawelwch", yn cyd-fynd yn gryf â gwaith y Cyngor ledled Sir Gaerfyrddin - gan ein hatgoffa bod cyfathrebu yn llawer mwy na sain a lleferydd. Rydym ni'n cyfathrebu drwy fynegiannau wyneb, arwyddion, ystumiau, cyffwrdd, technoleg, cyswllt llygad, geiriau ysgrifenedig, a dealltwriaeth a rennir. Rydym ni'n cyfathrebu drwy gysylltu.

Ar draws ein Hawdurdod Lleol, mae gennym y fraint o gefnogi dros 200 o blant a phobl ifanc o enedigaeth i adael yr ysgol, pob un â'i anghenion cyfathrebu, hunaniaethau a photensial unigryw eu hunain. Rydym yn hyrwyddo pob dull cyfathrebu, gan gynnwys Iaith Arwyddion Prydain (BSL), lleferydd, Cymraeg / Saesneg â Chymorth Iaith Arwyddion, a Chyfathrebu Cyflawn. I lawer o'n dysgwyr, mae cyfathrebu yn gyfuniad cyfoethog a deinamig o ddulliau - o leisio a arwyddo i ddyfeisiau ac ymddygiad cynorthwyol - pob un yr un mor ddilys, pwerus ac yn haeddu cydnabyddiaeth.

Wrth wraidd y gwaith hwn mae ein staff ymroddedig ac arbenigol. Rydym yn hynod ffodus i gael chwe Athro Cymwysedig Arbenigol i Blant a Phobl Ifanc Byddar yn Sir Gaerfyrddin. Maent yn gweithio'n ddiflino ar draws ein Darpariaethau Adnoddau Cynradd ac Uwchradd neu fel Athrawon Ymgynghorol Peripatetig yn y Gwasanaeth Namau Synhwyraidd, sydd o fewn ein Tîm Anghenion Dysgu Ychwanegol (ADY). Mae dau ohonynt hefyd yn rhieni plant byddar eu hunain, gan ddod â haen bersonol iawn o empathi, mewnwelediad, a phrofiad byw i'w harbenigedd proffesiynol.

Ers mis Medi 2024, mae ein Gwasanaeth Namau Synhwyraidd wedi cael ei arwain gan Reolwr Gwasanaeth newydd, sy'n hollol fyddar eu hun ac yn Athrawes Gymwysedig Arbenigol Disgyblion Byddar ac yn Awdiolegydd Addysgol Cymwysedig. Mae ei ethos wedi'i wreiddio mewn dealltwriaeth ddilys ac eiriolaeth dros blant byddar a'u teuluoedd.

Rydym hefyd eisiau rhoi cydnabyddiaeth galonnog i'n Cynorthwywyr Addysgu - y mae eu sgiliau, eu tosturi a'u hymrwymiad o ddydd i ddydd mewn lleoliadau arbenigol a phrif ffrwd yn sicrhau bod pob dysgwr byddar yn teimlo ei fod yn cael ei weld, ei glywed a'i gefnogi. Ni ellir gorbwysleisio eu cyfraniad at gynhwysiant.

Mae ein hysgolion yn gwneud gwaith eithriadol i sicrhau profiadau sy'n cynnwys pawb, sy'n grymuso ac yn cyfoethogi. Mae ein darpariaethau arbenigol yn darparu mannau diogel lle mae dysgwyr byddar yn ffynnu mewn amgylchedd cefnogol sy'n gyfoethog o iaith, tra bod ein hysgolion prif ffrwd yn parhau i godi ymwybyddiaeth, chwalu rhwystrau, a chreu mannau dysgu lle gall plant byddar gymryd rhan yn llawn ac yn hyderus.

Ymysg y gwaith ardderchog a welwyd gan ysgolion Sir Gaerfyrddin mae:

Un enghraifft o'r fath yw Ysgol Parcyrhun, sy'n gartref i Ddarpariaeth Adnoddau Sylfaenol y Cyngor, lle mae dysgwyr wedi cydweithio â Chomisiynydd Plant Cymru i godi ymwybyddiaeth o BSL a chynhwysiant byddar. Mae eu fideo gwych, sy'n cynnwys disgyblion byddar a disgyblion sy'n gallu clywed yn defnyddio BSL, yn ymddangos yn falch ar lwyfannau cyfryngau cymdeithasol y Comisiynydd yr wythnos hon.

Yn Ysgol Uwchradd y Frenhines Elizabeth, mae Darpariaeth Adnoddau Uwchradd y Cyngor wedi datblygu Rhaglen Model Rôl Byddar barhaus. Mae'r fenter ysbrydoledig hon yn croesawu unigolion Byddar llwyddiannus o ystod eang o gefndiroedd yn rheolaidd i'r lleoliad i rannu eu profiadau, herio stereoteipiau, ac ysbrydoli ein pobl ifanc i gredu nad oes terfynau i'r hyn y gallant ei gyflawni.

Y tymor diwethaf, trefnodd Ysgol Bryngwyn i sesiynau blasu BSL gael eu cyflwyno i bob dosbarth Blwyddyn 7, gan hyrwyddo cynhwysiant, empathi a chyfathrebu y tu hwnt i'r gair llafar — enghraifft wych o sut y gall ysgolion prif ffrwd gofleidio thema'r Wythnos Ymwybyddiaeth o Fyddardod, sef Tu Hwnt i Dawelwch. Mae clwb BSL Ysgol Bryngwyn wedi cymryd rhan mewn digwyddiadau Eisteddfodau ysgol a 'Bryngwyn's Got Talent' dros y ddwy flynedd ddiwethaf, diolch i ymdrech wych Cynorthwywyr Addysgu sy'n arwain y mentrau hynny.

Ddydd Sadwrn yma, 10 Mai 2025, mae Llyfrgell Caerfyrddin yn edrych ymlaen at groesawu teuluoedd babanod byddar a phlant ifanc byddar 0–5 oed am fore o gysylltiad a dathlu, gan gynnwys sesiwn Cerddoriaeth Baby Beats, adrodd straeon wedi'u harwyddo, a chwarae — cyfle gwych i gwrdd â theuluoedd a gweithwyr proffesiynol eraill mewn amgylchedd hamddenol, cefnogol.

Dywedodd yr Aelod Cabinet dros Addysg a'r Gymraeg - y Cynghorydd Glynog Davies:

Fel awdurdod lleol rydym yn hynod falch o gyflawniadau pob un o'n dysgwyr byddar ac yn ddiolchgar i'n hathrawon a'n staff arbenigol am y gwaith gwych y maent yn ei wneud i gefnogi ein plant a'n pobl ifanc. 

Diolch i chi i gyd, rydych chi'n dyst i bŵer cynhwysiant, harddwch a chyfoeth cyfathrebu amrywiol, a phwysigrwydd cymuned.”