Bouygues UK a Chyngor Sir Gaerfyrddin yn Lansio Cynllun Profiad Gwaith Sgiliau'r 21ain Ganrif Pentre Awel

Mae Cyngor Sir Caerfyrddin a Bouygues UK wedi lansio Cynllun Profiad Gwaith Sgiliau'r 21ain Ganrif Pentre Awel i rymuso dysgwyr o ysgolion lleol am yrfaoedd ym maes adeiladu a dylunio.

Mae'r cynllun, a lansiwyd ym Mharc y Scarlets, mewn partneriaeth â phum ysgol leol: Ysgol Bryngwyn; Ysgol Coedcae; Ysgol Penrhos; Ysgol Gyfun Gatholig Sant Ioan Llwyd; ac Ysgol y Strade. Mae'n cynrychioli cydweithio i ysbrydoli dysgwyr ifanc ar gyfer eu dyfodol a gwella eu gwybodaeth am lwybrau gyrfa a sgiliau cyffredinol sydd eu hangen yn y gweithle.

Mae Pentre Awel yn gyfle gwych i ehangu gorwelion dysgwyr ifanc Llanelli, gan ddatblygu agweddau ac ymddygiadau a fydd yn eu helpu i lwyddo yn eu dyfodol. Trwy gydol y gwaith o adeiladu Parth 1, bydd Bouygues UK yn chwarae rhan hanfodol wrth gyd-ddylunio a darparu cyd-destun y diwydiant a fydd yn cynnig profiadau dysgu ystyrlon i fyfyrwyr.  Bydd y cynllun yn cynnig profiadau trawsnewidiol a chwricwlaidd, gan weithio mewn partneriaeth ag arbenigwyr proffesiynol Bouygues UK i greu Prosiect Ymholiadau i Ddysgwyr ar feysydd ym maes Dylunio ac Adeiladu.

Dywedodd Nina Williams, Ymgynghorydd Gwerth Cymdeithasol Bouygues UK ar gyfer Pentre Awel:

Mae hwn yn ddull radical o ymdrin â gyrfaoedd a phrofiadau sy'n gysylltiedig â gwaith i ysgolion. Bydd y prosiect hefyd yn grymuso ysgolion i feithrin perthynas â diwydiannau yn y dyfodol, gan ddefnyddio gwybodaeth a phrofiad gweithwyr proffesiynol i wella a datblygu eu sylfaen wybodaeth y gellir ei chymhwyso wrth ddylunio'r cwricwlwm yn y dyfodol."

Dywedodd y Cynghorydd Gareth John, Aelod Cabinet Cyngor Sir Caerfyrddin dros Adfywio, Hamdden, Diwylliant a Thwristiaeth:

Mae Pentre Awel yn brosiect adfywio strategol allweddol ar gyfer Cyngor Sir Caerfyrddin sy'n cyfuno elfennau sy'n cwmpasu Busnes, y Byd Academaidd, Iechyd, Gofal a'n Cymuned. Mae gweithio gyda'n pobl ifanc yn hanfodol i lwyddiant y prosiect hwn ac rwy'n croesawu'r cyfle gwych hwn i roi cipolwg unigryw iddynt ar y diwydiant adeiladu yma yn ein Sir.”

Fel rhan o ymrwymiad Bouygues UK i ddarparu gwerth cymdeithasol ac ymgysylltiad sylweddol i ysgolion, colegau a phrifysgolion cyfagos, mae cynllun llysgenhadon ysgolion hefyd. Mae Bouygues UK yn awyddus i'r plant rannu eu syniadau a helpu i lunio'r prosiect, a fydd yn ei dro yn eu galluogi i weld drostynt eu hunain y gwaith sy'n mynd i mewn i'r broses adeiladu. Bydd y plant yn ymweld â'r safle yn rheolaidd i weld y cynnydd sy'n cael ei wneud a byddant yn gweithio ar brosiectau ysgolion sy'n canolbwyntio ar adeiladu a chrefftau adeiladu.

Mae Menter Sgiliau'r 21ain Ganrif yn rhan o raglen ehangach o fuddion cymunedol i'w darparu yn ystod datblygiad Parth 1 Pentre Awel, er mwyn rhoi bod i fuddion cymdeithasol, economaidd, diwylliannol ac amgylcheddol. Mae hyn yn cynnwys recriwtio a hyfforddi wedi'u targedu, ymgysylltu â'r gymuned (fel llysgenhadon cymunedol), gweithgareddau STEM ac ymgysylltu â'r gadwyn gyflenwi.

Y datblygiad mawreddog ac arloesol gwerth miliynau o bunnoedd sy'n cael ei gyflawni gan Gyngor Sir Caerfyrddin yw'r cynllun adfywio mwyaf yn Ne-orllewin Cymru. Bydd yn dod â gwyddorau bywyd ac arloesi busnes, gofal iechyd cymunedol a chyfleusterau hamdden modern at ei gilydd ar safle 83 erw Llynnoedd Delta ar arfordir Llanelli.

Bydd y datblygiad yn cynnwys canolfan hamdden newydd o'r radd flaenaf a phwll hydrotherapi ynghyd â lle addysg, ymchwil a datblygu busnes; canolfan ymchwil a darpariaeth glinigol; a chanolfan sgiliau llesiant. Y tu allan, bydd gan ddatblygiad Pentre Awel fannau cyhoeddus awyr agored wedi'u tirlunio ar gyfer hamdden, cerdded a beicio.

Mae’r cynllun gwirioneddol gydweithredol yn cael ei ddarparu ar gyfer y gymuned leol gan Gyngor Sir Caerfyrddin mewn partneriaeth â Bwrdd Iechyd Prifysgol Hywel Dda, Prifysgolion a cholegau ac mae’n cael ei ariannu’n rhannol gan Fargen Ddinesig Bae Abertawe (£40miliwn). Y bwriad yw creu tua 1,800 o swyddi dros 15 mlynedd a rhoi hwb o fwy na £450m i’r economi leol.