Sir Gaerfyrddin yn ymuno â Rhwydwaith Byd-eang Sefydliad Iechyd y Byd o Ddinasoedd a Chymunedau sy'n Oed-gyfeillgar.

Mae Sir Gaerfyrddin wedi ymuno â Rhwydwaith Byd-eang Sefydliad Iechyd y Byd (WHO) o Ddinasoedd a Chymunedau sy'n Oed-gyfeillgar, gyda sefydliadau lleol yn ymuno â'i gilydd ac yn tynnu sylw at eu hymrwymiad i gefnogi pobl hŷn i fyw'n dda, aros yn annibynnol, a chadw mewn cysylltiad.

Gan adeiladu ar y cynnydd a wnaed hyd yn hyn, rhwydwaith cynyddol o bartneriaid ar draws y sectorau cyhoeddus, preifat a gwirfoddol, gan gynnwys Cyngor Sir Caerfyrddin, bydd y ffocws parhaus ar ddod â phreswylwyr, grwpiau cymunedol, mudiadau gwirfoddol a phartneriaid yn y sector cyhoeddus at ei gilydd i gynhyrchu cynllun gweithredu a rennir sy'n adlewyrchu profiadau a blaenoriaethau gwirioneddol pobl hŷn ledled y sir.

Bydd cynllun gweithredu ar y cyd yn canolbwyntio ar ddatblygu blaenoriaethau yn unol ag wyth maes fframwaith Sefydliad Iechyd y Byd ar gyfer creu dinasoedd a chymunedau sy'n oed-gyfeillgar. Bydd gwelliannau i fannau awyr agored ac adeiladau, trafnidiaeth, tai, cyfranogiad cymdeithasol, parch a chynhwysiant cymdeithasol, cyfranogiad dinesig a chyflogaeth, cyfathrebu a gwybodaeth a chefnogaeth gymunedol a gwasanaethau iechyd.   

Mae'r gwaith yn rhan o ymrwymiad Llywodraeth Cymru i gefnogi cynghorau i adeiladu amgylcheddau sy'n oed-gyfeillgar, sy'n alinio â'i strategaeth ar gyfer creu Cymru sy'n oed-gyfeillgar.  

Dywedodd y Cynghorydd Jane Tremlett, Aelod Cabinet Cyngor Sir Caerfyrddin dros Wasanaethau Cymdeithasol i Oedolion, Plant a Theuluoedd:

Mae'r gwaith cadarnhaol sydd wedi'i wneud hyd yn hyn yn pwysleisio ymrwymiad y Cyngor i greu amgylcheddau sy'n galluogi pobl i gyfranogi ac aros yn annibynnol. 

Drwy weithio'n agos gyda grwpiau cymunedol, sefydliadau gwirfoddol, partneriaid y sector cyhoeddus, a rhwydweithiau lleol dibynadwy, byddwn ni'n parhau â'r gwaith rhagorol sydd wedi'i wneud ac yn ymestyn ein cyrraedd, gan gasglu lleisiau pobl hŷn o bob cefndir, gan gynnwys y rhai nad ydynt yn cael eu clywed yn aml.

Gyda phoblogaeth gynyddol sy'n heneiddio yn Sir Gaerfyrddin, mae'n bwysig ein bod yn cydnabod y rhwystrau y gall pobl hŷn eu hwynebu'n aml fel y gallwn barhau i ddatblygu gwasanaethau, cyfleusterau cymunedol a chyfleoedd cymdeithasol i ni i gyd fyw a heneiddio'n dda.”