Cydnabod arloesedd digidol Sir Gaerfyrddin gan wahodd swyddog o’r Cyngor i Ddigwyddiad Cenedlaethol Microsoft AI

Mae gwaith Cyngor Sir Caerfyrddin i gyflwyno offer deallusrwydd artiffisial ar draws gwasanaethau'r cyngor wedi derbyn cydnabyddiaeth genedlaethol, wrth i Georgia Sweet, Swyddog Prosiect Trawsnewid Digidol yn nhîm Gwasanaethau Digidol y Cyngor, gael gwahoddiad i gymryd rhan mewn digwyddiad mawr ledled y DU gyda Microsoft yn arddangos dyfodol deallusrwydd artiffisial yn y sector cyhoeddus.

Roedd Georgia yn un o nifer fach o gynrychiolwyr o bob cwr o'r DU a ddewiswyd i fynychu Taith Microsoft AI ar 24 Chwefror, lle rhannodd sefydliadau blaenllaw sut maen nhw'n defnyddio Microsoft Copilot i drawsnewid ffyrdd o weithio, gwella effeithlonrwydd a chefnogi staff.

Mae Georgia wedi chwarae rhan ganolog wrth gyflwyno Copilot yng Nghyngor Sir Caerfyrddin, gan gefnogi staff drwy raglen beilot dan oruchwyliaeth sydd eisoes wedi dangos manteision amlwg. Mae adborth cynnar wedi dangos gwell cynhyrchiant, ymateb cynt i gwsmeriaid a hygyrchedd gwell i staff sy'n elwa ar offer cefnogol AI i ysgrifennu, crynhoi a phrosesu gwybodaeth.

Roedd Microsoft wedi tynnu sylw at waith y Cyngor, ochr yn ochr â gwaith cynghorau Abertawe a Rhondda Cynon Taf, fel enghraifft o arfer da mewn arloesi digidol gan fabwysiadu deallusrwydd artiffisial mewn modd cyfrifol ym maes llywodraeth leol.

Wrth siarad am y gydnabyddiaeth, dywedodd Georgia Sweet:

Roedd mynychu Taith Microsoft AI yn Llundain yn gyfle anhygoel i arddangos sut rydyn ni’n defnyddio AI i wella gwasanaethau i drigolion yn Sir Gaerfyrddin. Roedd gweld ein gwaith yn cael ei amlygu ar lwyfan byd-eang yn ysbrydoledig, ac roedd yn atgyfnerthu'r effaith y gall arloesi meddylgar a chyfrifol ei chael ar ein hawdurdod lleol a’r cymunedau rydyn ni'n eu gwasanaethu.”

Roedd Microsoft hefyd yn cynnwys gwaith Sir Gaerfyrddin mewn darn golygyddol ar gyfer UK Stories, gan dynnu sylw at y ffaith fod y Cyngor wedi mabwysiadu offer AI yn gynnar i wella gwasanaethau a moderneiddio prosesau mewnol.

Dywedodd y Cynghorydd Philip Hughes, Aelod Cabinet Cyngor Sir Caerfyrddin dros Drefniadaeth a'r Gweithlu:

Rydyn ni'n falch iawn o Georgia a'n tîm digidol am arwain y ffordd wrth fabwysiadu technoleg newydd yn ddiogel ac yn gyfrifol. Mae'r gydnabyddiaeth hon gan Microsoft yn dangos sut mae Sir Gaerfyrddin yn croesawu arloesedd i gefnogi ein staff a darparu'r gwasanaeth gorau posibl i breswylwyr.”

Bydd y Cyngor yn parhau i ddatblygu ei ymagwedd at AI, gan sicrhau bod offer fel Copilot yn cael eu cyflwyno mewn ffordd ddiogel, foesegol ac ymarferol sy'n gwella - yn hytrach na disodli - gwaith staff ar draws y sefydliad.