Sir Gâr - Y Lle Mwyaf Rhamantus yng Nghymru
4 diwrnod yn ôl
Mae ymgyrch newydd fentrus yn tynnu sylw at Sir Gâr fel y gyrchfan fwyaf rhamantus yng Nghymru ar gyfer priodasau a dathliadau arbennig. Gyda'i arfordir ysblennydd, adfeilion hanesyddol, gerddi tawel a lleoliadau hyfryd, mae'r rhanbarth yn cynnig lleoliad hudolus i gyplau sy'n dweud "Gwnaf".
Ers amser maith, mae tirwedd Sir Gâr wedi bod yn rhan annatod o chwedloniaeth Cymru. Yn ôl y sôn, dyma leoliad stori garu drasig Myrddin a Morwyn y Llyn. Mae'r ymdeimlad dwfn hwn o ryfeddod, angerdd a thraddodiad yn parhau i ysbrydoli cyplau heddiw gan osod Sir Gâr uwchlaw pob man arall fel y lle mwyaf rhamantus.
Fel rhan o'r ymgyrch hon, mae Cyngor Sir Caerfyrddin yn lansio dwy fenter allweddol yn gynnar yn 2026:
- Cyfeiriadur priodasau newydd sbon - Canllaw cynhwysfawr i'r cyflenwyr, y lleoliadau, y gweithwyr proffesiynol creadigol a'r gwneuthurwyr artisan gorau ar gyfer priodasau yn Sir Gâr. Bydd y cyfeiriadur hwn yn hyrwyddo talent y sir ac yn ei gwneud hi'n haws i gyplau gynllunio dathliadau bythgofiadwy yn Sir Gâr.
- Arddangosfa 'Cwrdd â'r Cyflenwr' - 20 Ionawr 2026 - Yn cael ei gynnal yn y Tŷ Gwydr Mawr ysblennydd, Gardd Fotaneg Genedlaethol Cymru, bydd y digwyddiad Busnes i Fusnes hwn yn dod â chyflenwyr dethol, rheolwyr lleoliadau, cofrestryddion a gweinyddion Sir Gâr, cydlynwyr priodasau a gweithwyr proffesiynol twristiaeth ynghyd ar gyfer diwrnod o rwydweithio, cydweithio a datblygu busnes.
Bydd yr arddangosfa hefyd yn cynnwys cyfres o weithdai a seminarau ymarferol am ddim, wedi'u cynllunio i helpu busnesau i gryfhau eu cynnig a gwneud y mwyaf o broffil cynyddol y sir:
- Strategaeth Cyfryngau Cymdeithasol ac Ymgysylltu - Purple Dog
- Deallusrwydd Artiffisial mewn Busnes - Steve Huggett, TG Associates
- Creu Cynnwys Fideo ar gyfer y Cyfryngau Cymdeithasol – Sgript
- Datgloi gwerth gweithio gyda Chofrestryddion a Gweinyddion Sir Gâr
Yn ogystal, bydd Sioe Deithiol Busnes (10am-3pm) yn cael ei chynnal drwy gydol y dydd gan roi cyfle i gwrdd yn uniongyrchol â swyddogion Cyngor Sir Gâr i gael cyngor wedi'i deilwra ar y canlynol: trwyddedu, cynllunio a chyllid, cyfleoedd grant cyfredol, cefnogaeth marchnata a thwristiaeth a Chofrestryddion a Gweinyddion Sir Gâr.
Mae priodasau yn cyfrannu tua £6 miliwn at economi Sir Gâr bob blwyddyn. Nod y cyfeiriadur newydd a'r arddangosfa yw rhoi hwb i hyn drwy gryfhau'r gadwyn gyflenwi leol, cadw mwy o wariant priodasau yn y sir a chreu cyfleoedd gwell i leoliadau, darparwyr gwasanaethau a chrewyr lleol.
Dywedodd y Cynghorydd Hazel Evans, yr Aelod Cabinet dros Adfywio, Hamdden, Diwylliant a Thwristiaeth:
“Mae Sir Gâr yn un o'r cyrchfannau mwyaf rhamantus yng Nghymru, ac rydyn ni am i gymaint o fusnesau lleol â phosibl elwa ar sector priodasau cynyddol y sir. Drwy ddod â chyflenwyr a lleoliadau at ei gilydd o dan yr un to, rydyn ni'n cryfhau'r gadwyn gyflenwi leol, yn cadw gwariant yn ein cymunedau, ac yn dangos y dalent anhygoel sydd gennyn ni yma ar garreg ein drws.”
Gwahoddir busnesau ym meysydd blodau, gemwaith, addurniadau, ffotograffiaeth, arlwyo, trafnidiaeth, harddwch, adloniant a mwy i gymryd rhan yn yr arddangosfa a chael eu cynnwys yn y cyfeiriadur sy'n gyfle unigryw i dynnu sylw at eich busnes, datblygu partneriaethau newydd, a manteisio ar farchnad sy'n chwilio am yr anghyffredin.
Sir Gâr yw lle mae tirweddau'n ysbrydoli, lle mae straeon yn parhau, a lle mae cariad yn parhau.
