Rhaglen llysgenhadon chwaraeon ifanc yn parhau i ysbrydoli arweinwyr y dyfodol

Mae mwy na 320 o ddisgyblion o ysgolion cynradd ar draws Sir Gaerfyrddin wedi cymryd eu camau cyntaf i rolau arweinyddiaeth drwy Raglen Llysgenhadon Chwaraeon Ifanc, gyda chefnogaeth Tîm Cymunedau Actif Cyngor Sir Caerfyrddin.

Ym mis Medi, cynhaliodd Tîm Cymunedau Actif y Cyngor sesiynau hyfforddiant fel rhan o'r gwaith parhaus o gyflwyno'r fenter Llysgenhadon Chwaraeon Ifanc, gyda'r nod o helpu pobl ifanc i ddatblygu'r sgiliau, yr hyder a'r profiad sydd eu hangen i ddod yn wirfoddolwyr ac yn arweinwyr ym myd chwaraeon a gweithgarwch corfforol yn y dyfodol.

Dros y mis diwethaf, mae 323 o bobl ifanc rhwng 10 ac 11, sy'n cynrychioli tua 90% o ysgolion cynradd y wlad, wedi cael eu hyfforddi a'u cydnabod fel Llysgenhadon Chwaraeon Ifanc Efydd. Drwy'r rôl hon, bydd gan ddisgyblion gyfleoedd i arwain sesiynau gweithgarwch corfforol yn ystod amser allgyrsiol a gweithredu fel eiriolwyr dros addysg gorfforol a chwaraeon ysgol o fewn eu hysgolion.

Sefydlwyd y Rhaglen Llysgenhadon Chwaraeon Ifanc fel rhan o waddol Gemau Olympaidd Llundain 2012 ac yn parhau i ysbrydoli pobl ifanc i aros yn egnïol ac i gymryd rhan mewn chwaraeon. Mae cyfranogwyr eisoes wedi cyfrannu mwy na 1,000 o oriau gwirfoddoli, gan gefnogi digwyddiadau ysgol, mentora cymheiriaid, a hyrwyddo cysylltiadau â chlybiau chwaraeon cymunedol.

Bydd cam nesaf y rhaglen yn canolbwyntio ar recriwtio Llysgenhadon Arian ac Aur o ysgolion uwchradd, gan ddarparu cyfleoedd ar gyfer datblygiad arweinyddiaeth parhaus.

Dywedodd Lyn Brodrick, Swyddog Pobl Ifanc Egnïol Cyngor Sir Caerfyrddin:

Mae'r rhaglen hon yn ymwneud â rhoi llais i bobl ifanc a datgloi potensial. Rydyn ni'n credu yng ngrym pobl ifanc i arwain, i ysbrydoli, ac i greu newid. Mae Llysgenhadon Chwaraeon Ifanc yn rhoi'r offer, y cyfle, a'r profiadau sydd eu hangen arnyn nhw i wneud hynny.”

Dywedodd y Cynghorydd Hazel Evans, Aelod Cabinet Cyngor Sir Caerfyrddin dros Adfywio, Hamdden, Diwylliant a Thwristiaeth:

Mae'r fenter hon yn chwarae rhan bwysig wrth ddatblygu hyder a sgiliau arwain pobl ifanc yn Sir Gaerfyrddin. Drwy annog disgyblion i gymryd cyfrifoldeb ac arwain drwy esiampl, mae'r Rhaglen Llysgenhadon Chwaraeon Ifanc yn cefnogi'r nod hirdymor o greu cymunedau egnïol a chydnerth. 

Mae'n wych gweld cynifer o ysgolion yn ymgysylltu â'r cynllun ac yn rhoi cyfle i ddisgyblion gyfrannu at fywyd ysgol a chymunedol drwy chwaraeon.”

Mae cyfranogwyr yn cael hyfforddiant o ran arweinyddiaeth, cyfathrebu, gwaith tîm a darparu gweithgareddau diogel â phwrpas - sgiliau sy'n cefnogi eu rolau fel llysgenhadon a'u datblygiad personol ehangach. Mae llawer o gyn-lysgenhadon wedi symud ymlaen i swyddi arwain mewn ysgolion uwchradd, wedi dod yn Llysgenhadon Aur, neu wedi ymgymryd â rolau hyfforddi a gwirfoddoli mewn clybiau chwaraeon lleol.

Rhannodd cyfranogwr, Sophie, y profiad a gafodd:

Mae bod yn rhan o lysgenhadon chwaraeon ifanc wedi newid fy mywyd. Rydw i wedi dysgu sut i siarad, bod yn flaengar, a gwneud gwahaniaeth. Mae wedi dangos i mi y gallaf fod yn arweinydd - nid yn unig yn y dyfodol, ond nawr."

Mae Cymunedau Actif bellach yn gwahodd clybiau cymunedol a chyrff llywodraethu chwaraeon cenedlaethol i gydweithio i ddarparu cyfleoedd pellach i'r arweinwyr ifanc hyn ac i gefnogi twf y rhaglen yn y dyfodol.

I gael rhagor o wybodaeth am y Rhaglen Llysgenhadon Chwaraeon Ifanc, neu i ddarganfod sut i gymryd rhan neu gefnogi'r fenter, cysylltwch â: ActifCommunities@sirgar.gov.uk