Cabinet y Cyngor yn ystyried argymhellion ynghylch trwyddedu bridio cŵn

Mae Cabinet Cyngor Sir Caerfyrddin wedi cymeradwyo argymhellion i'w hystyried ynghylch swyddogaeth trwyddedu bridio cŵn yn y sir yn dilyn adolygiad gan y Grŵp Gorchwyl a Gorffen.

Prif nodau'r adolygiad oedd archwilio sut mae'r tîm ar hyn o bryd yn cyflawni'r gwaith o reoleiddio trwyddedu bridio cŵn ac argymell meysydd i'w gwella. Arweiniodd hyn at nifer o argymhellion lleol a chenedlaethol.

Yr argymhellion lleol:

·       Gwneud ymarfer adennill costau trylwyr ac adolygu'r gwaith o bennu ffioedd i sicrhau bod costau'n cael eu cofnodi'n gywir

·       Gwella dealltwriaeth milfeddygon lleol o'r gofynion ar gyfer bridwyr trwyddedig drwy eu hannog i ymuno â'r Cynllun Prynu â Hyder

·       Gwella gwybodaeth y cyhoedd drwy hyrwyddo gwaith y Tîm Lles Anifeiliaid ymhellach

·       Archwilio opsiynau i gyflwyno system sgorio orfodol ar gyfer bridwyr trwyddedig i wella cysondeb

·       Cynyddu adnoddau o fewn y Tîm Iechyd Anifeiliaid gan gynnwys ystyried cyflwyno cais twf

Mae'r argymhellion cenedlaethol a nodir yn gofyn i Lywodraeth Cymru ystyried:

·       Adolygu effeithiolrwydd y tîm Trwyddedu Anifeiliaid Cymru i sicrhau bod cyllid yn cael ei ddefnyddio yn y ffordd orau

·       Adolygu'r meini prawf ar gyfer pennu ffioedd ac ystyried cynnwys cyfran o gost y gwaith o orfodi'r cynllun trwyddedu

·       Adolygu cwmpas y ddeddfwriaeth ac ailgychwyn yr adolygiad o amodau trwyddedu

·       Ymchwilio i'r angen am grŵp cenedlaethol i gynorthwyo a chefnogi bridwyr cŵn, yn debyg i'r Undeb Amaethwyr

·       Ystyried cyflwyno cronfa ddata microsglodyn ganoledig

·       Rhoi pen ar fridio anghyfreithlon drwy adolygu'r trefniadau rhannu gwybodaeth cyfredol gan gynnwys Trwyddedu Anifeiliaid Cymru a chyflwyno gorfodaeth i gofrestru pob ci bach sy'n cael ei eni

·       Gwella safonau'n gyson trwy ystyried gweithredu system sgorio genedlaethol ac archwilio'r defnydd o ddulliau gorfodi ychwanegol ar gyfer achosion o fân dorri rheolaeth fel Hysbysiadau Cosb Benodedig

Cafodd yr adolygiad, a ddatblygwyd trwy Grŵp Gorchwyl a Gorffen, ei gynnal trwy gyfres o gyfarfodydd ynghyd ag archwilio'r polisïau a gweithdrefnau presennol yn drylwyr, ymgynghori â rhanddeiliaid (gan gynnwys ymgynghoriad cyhoeddus) a chynnal ymweliadau safle â bridwyr trwyddedig.

Dywedodd y Cynghorydd Kevin Madge, Cadeirydd y Grŵp Gorchwyl a Gorffen:

 “Diolch i'r bridwyr trwyddedig a groesawodd y grŵp i'w safleoedd, yn ogystal â'r aelodau hynny o'r cyhoedd a roddodd adborth gwerthfawr yn yr ymarfer ymgynghori. Roedd y cymorth hwn yn werthfawr i'n helpu i lunio'r argymhellion a nodir yn yr adroddiad, ac rydym yn gobeithio y byddant bellach yn cael eu datblygu i wella'r swyddogaeth trwyddedu bridio cŵn yn Sir Gaerfyrddin.”

Y Cynghorydd Aled Vaughan Owen said:

"Diolch i aelodau'r Grŵp Gorchwyl a Gorffen am eu gwaith rhagorol wrth adolygu swyddogaeth trwyddedu bridio cŵn y Cyngor a gyflawnir gan y Tîm Lles Anifeiliaid. Mae'r adolygiad hwn wedi tynnu sylw at waith rhagorol a chanlyniadau cyson tîm bach sy'n chwarae rhan hanfodol wrth orfodi deddfwriaeth iechyd a lles anifeiliaid, gan amddiffyn lles anifeiliaid a bridwyr cyfreithlon.”