Prydau Ysgol am Ddim ar gael i bob disgybl cynradd yn Sir Gaerfyrddin

Mae Cyngor Sir Caerfyrddin yn atgoffa teuluoedd bod pob plentyn ysgol gynradd ledled y sir yn gymwys i gael prydau ysgol am ddim.

Os hoffai'ch plentyn ddechrau cael cinio ysgol, cysylltwch â'ch ysgol yn uniongyrchol a rhowch wybod iddyn nhw am unrhyw ofynion dietegol.

Fel rhan o'i ymdrechion parhaus i gefnogi teuluoedd drwy'r argyfwng costau byw a hyrwyddo ffyrdd iach o fyw, mae'r Cyngor yn annog rhieni a gofalwyr i fanteisio i'r eithaf ar y cynnig hwn. Gall pob disgybl dderbyn cinio ysgol poeth, maethlon bob dydd—yn rhad ac am ddim, oherwydd cyllid Llywodraeth Cymru.

Mae prydau bwyd yn cael eu paratoi'n ffres ar y safle mewn ysgolion bob dydd gan Dimau Arlwyo Ysgolion y Cyngor, gan ddefnyddio cynnyrch Cymreig o ffynonellau lleol, gan gynnwys cig, llaeth a llysiau o safon. Mae'r bwydlenni'n bodloni canllawiau maeth Llywodraeth Cymru ac maen nhw wedi'u cynllunio i gefnogi iechyd disgyblion a'u gallu i ganolbwyntio, tra'n cynnig amrywiaeth a dewis.

Mae dewis prydau ysgol am ddim yn cynnig llawer o fanteision, gan gynnwys arbed amser gan nad oes angen paratoi cinio pecyn a lleihau costau bwyd cartref. Mae'r prydau yn cynnig dewisiadau cytbwys, iach gyda llysiau, saladau a ffrwythau ffres i helpu plant i gael '5 y dydd'. Mae amserau bwyd hefyd yn creu amgylchedd cymdeithasol gwerthfawr lle mae plant yn datblygu moesgarwch wrth y bwrdd bwyd ac yn cael cyfle i roi cynnig ar fwydydd newydd.

Dywedodd y Cynghorydd Linda Evans, Dirprwy Arweinydd y Cyngor:

Ni ddylai unrhyw blentyn orfod dysgu gyda stumog wag, ac ni ddylai unrhyw deulu orfod poeni am sut y byddan nhw'n talu am y cinio ysgol nesaf. Mae'r fenter hon yn ymwneud â helpu teuluoedd a rhoi'r amgylchedd gorau i bob plentyn lwyddo. Rwy'n annog rhieni i fanteisio i'r eithaf ar hyn - mae'r prydau bwyd yn iach, am ddim, ac yn cyfrannu cymaint at les a dysgu plant.

Er bod pob plentyn cynradd yn gymwys i gael prydau ysgol am ddim o dan gynllun Llywodraeth Cymru, mae gan rai teuluoedd hawl i brydau ysgol am ddim drwy feini prawf sy'n gysylltiedig â budd-daliadau. Hoffwn annog y rhai sy'n gymwys i gael prydau ysgol am ddim drwy eu meini prawf budd-daliadau i gofrestru yma , gan fod hyn nid yn unig yn cefnogi lles eu plentyn ond hefyd yn galluogi ysgolion i gael mynediad at gyllid hanfodol Grant Datblygu Disgyblion sydd o fudd i gymuned gyfan yr ysgol.” 

Mae rhagor o wybodaeth am y cynllun, gan gynnwys bwydlenni a Chwestiynau Cyffredin, ar gael yma.