Enwebiadau ar agor ar gyfer Gwobrau Chwaraeon Actif Sir Gâr

6 diwrnod yn ôl

Mae enwebiadau bellach ar agor ar gyfer gwobrau mawreddog Chwaraeon Actif Sir Gâr 2025. Bellach yn ei 27ain flwyddyn, mae'r gwobrau'n dathlu'r gorau o chwaraeon yn y sir - gan gydnabod athletwyr, hyfforddwyr, gwirfoddolwyr, clybiau a thimau y mae eu hymroddiad a'u cyflawniadau yn ysbrydoli ein cymunedau.

Wedi'u trefnu gan Dîm Chwaraeon a Hamdden Cyngor Sir Caerfyrddin, mae Gwobrau Chwaraeon Actif Sir Gâr yn tynnu sylw at yr arwyr chwaraeon lleol a gwaith amhrisiadwy'r rhai sy'n cadw chwaraeon i ffynnu ar bob lefel.

Mae'r 13 categori ar gyfer y gwobrau eleni yn cynnwys:

  • Personoliaeth Chwaraeon y Flwyddyn
  • Chwaraewr a Chwaraewraig y Flwyddyn
  • Chwaraewr Anabl y Flwyddyn
  • Hyfforddwr Chwaraeon Cymunedol a Hyfforddwr Chwaraeon o Safon Uchel y Flwyddyn
  • Gwirfoddolwr a Pherson Ifanc Ysbrydoledig y Flwyddyn
  • Tîm Chwaraeon, Tîm Ifanc a Chlwb Chwaraeon y Flwyddyn
  • Gwobr Gwasanaeth Rhagorol i Chwaraeon
  • Oriel yr Anfarwolion

Gellir enwebu unrhyw un a anwyd yn Sir Gâr, sy'n byw yn y sir ar hyn o bryd, neu sy'n cynrychioli clwb neu ysgol yn Sir Gâr. Mae athletwyr, hyfforddwyr a gwirfoddolwyr hefyd yn gymwys i gael eu henwebu am sawl gwobr, er bod angen ffurflen enwebu ar wahân ar gyfer pob categori.

Mae enwebiadau'n agor ar 1 Medi ac yn cau ar 26 Hydref. Gellir enwebu athletwyr, hyfforddwyr a gwirfoddolwyr am sawl gwobr, ond mae angen ffurflen enwebu ar wahân ar gyfer pob categori.

Bydd yr enillwyr yn cael eu cyhoeddi mewn seremoni arbennig yn Theatr y Ffwrnes, Llanelli ym mis Chwefror 2026.

Dywedodd y Cynghorydd Hazel Evans, Aelod Cabinet dros Adfywio, Hamdden, Diwylliant a Thwristiaeth

“Gwobrau Chwaraeon Actif Sir Gâr yw ein ffordd ni o ddathlu talent, ymroddiad a’r angerdd rhyfeddol a geir dros chwaraeon yn ein sir. O wirfoddolwyr ar lawr gwlad i berfformwyr elitaidd, mae'r gwobrau hyn yn anrhydeddu'r bobl sy'n ysbrydoli eraill ac yn gwneud chwaraeon yn bosibl yn Sir Gâr. Rwy'n annog pawb i fanteisio ar y cyfle hwn i enwebu'r rheini sy'n haeddu cael eu cydnabod."

Gwahoddir unrhyw un sydd â diddordeb mewn noddi categori i gysylltu â ActifCommunities@sirgar.gov.uk.

I gael rhagor o wybodaeth neu i gyflwyno enwebiad, ewch i wefan Gwobrau Chwaraeon Actif Sir Gâr.