Prosiect Pentre Awel Bouygues UK yn Ennill Gwobr Amgylcheddol, Gymdeithasol a Llywodraethu (ESG) Gwobrau Adeiladu Arbenigrwydd yng Nghymru

Roedd Bouygues UK, contractwr Canolfan Pentre Awel yn Llanelli, yn falch o ennill y wobr ESG yng Ngwobrau Adeiladu Arbenigrwydd yng Nghymru.

Nod y Wobr ESG yw dathlu cynaliadwyedd cymdeithasol, economaidd ac amgylcheddol. Cafodd tîm safle Pentre Awel Bouygues UK eu cymeradwyo gan y beirniaid am eu hymroddiad i gael effaith gadarnhaol yn Sir Gaerfyrddin, creu cyfleoedd gyrfa, codi lefelau addysg a sgiliau, cefnogi busnesau lleol, ac ymgysylltu'n weithredol â'r gymuned. 

Gyda phob prosiect, nod Bouygues UK yw mynd i'r afael â heriau brys newid yn yr hinsawdd a chreu newidiadau a buddion cadarnhaol i'r cymunedau y mae'n gweithio ynddynt. Mae'n gwneud hyn trwy ymgorffori canllawiau carbon clir, gweithio'n agos gyda chleientiaid, partneriaid cadwyn gyflenwi a gweithwyr y cwmni i helpu i leihau'r effaith ar yr amgylchedd, a galluogi cymunedau i ffynnu.

Dyma’r prosiect mwyaf y mae Cyngor Sir Gâr wedi ymgymryd ag ef erioed, a chyda buddsoddiad sylweddol gan Fargen Ddinesig Bae Abertawe, roedd Bouygues UK wedi ymrwymo i gyflawni prosiect rhagorol ag ESG yn greiddiol iddo. O ganlyniad, mae’r tîm wedi cyflawni mwy na’r disgwyl o ran ei ymrwymiadau a'i dargedau gwerth cymdeithasol, gan gynnwys mwy na 5,300 o wythnosau o recriwtio a hyfforddiant wedi'i dargedu, yn ogystal â chyflawni sero net ar gyfer y gwaith adeiladu.

Dywedodd yr ymgynghorydd gwerth cymdeithasol, Nina Williams, fod ennill y wobr yn tystio i ymroddiad y tîm, ei bartneriaid a'r gadwyn gyflenwi ehangach sydd wedi gweithio gyda'i gilydd i adael etifeddiaeth barhaol a chadarnhaol i Sir Gaerfyrddin.

 

Meddai:

Mae Bouygues UK yn rhoi gwerth cymdeithasol wrth wraidd pob prosiect, gan sicrhau bod pobl leol yn elwa o gyfleoedd gwaith, hyfforddiant ac allgymorth addysgol. Rydym wedi cyflawni canlyniadau gwych trwy gydweithio â phartneriaid yn y gadwyn gyflenwi a'r gymuned leol. Fe wnaethom ragori ar ein targedau, gyda 76 o swyddi i newydd-ddyfodiad, 62 o brentisiaethau a chyfanswm o £35 miliwn mewn gwerth cymdeithasol (Social Value Portal, 2025).

Trwy gydweithio â'n rhanddeiliaid, roeddem yn gallu cyflawni gweithgareddau penodol i brosiectau, fel canolfan gyflogaeth bwrpasol gydag Acorn gan Synergie a Grŵp Cymorth Cyflogaeth Sir Gaerfyrddin, gan gefnogi 36 o bobl leol i gael cyflogaeth. Dyfeisiwyd her ddylunio 10 wythnos gyda chefnogaeth y Bartneriaeth Dysgu a Sgiliau Rhanbarthol ac Adran Addysg Cyngor Sir Gâr, ac ymgysylltwyd ag Ysgol Gelf Coleg Sir Gâr i ddylunio ein hysbysfyrddau i gynrychioli 7 nod lles Deddf Llesiant Cenedlaethau’r Dyfodol. Roedd y cydweithrediad hwn yn allweddol wrth sicrhau ein bod yn cael effaith gadarnhaol.

Cyflawnodd y prosiect sero net trwy roi strategaethau lleihau carbon ar waith, fel defnyddio olew llysiau wedi’i drin â dŵr (HVO) o olew coginio gwastraff, teledu cylch cyfyng a chabanau safle sy'n cael eu pweru gan yr haul, a deunyddiau gwyrdd â chyfran uchel o gynnwys wedi'i ailgylchu. Bu’r contractwr hefyd yn cydweithio â Gaia, sydd wedi’i leoli yn Sir Gaerfyrddin, i fonitro a lleihau'r defnydd o ynni trwy ddeallusrwydd artiffisial a synwyryddion, gan sicrhau arbedion ynni o 47.9%. Mae ymgynghorydd carbon sydd wedi’i neilltuo i’r prosiect yn parhau i gynghori ar strategaethau carbon isel ac uwchsgilio'r gweithlu ar arferion gorau yn ymwneud â’r hinsawdd a’r amgylchedd.

 

Ychwanegodd Peter Sharpe, Cyfarwyddwr Prosiect Canolfan Pentre Awel:

Fel busnes, mae gennym gyfrifoldeb i greu effaith barhaol, gadarnhaol i genedlaethau'r dyfodol. Mae pob prosiect rydyn ni'n ei gyflawni yn gyfle i wneud gwahaniaeth gwirioneddol trwy wella bywydau a chefnogi'r amgylchedd, ac rydym wedi ymrwymo i wneud y gorau o bob un. Rydym yn falch iawn o gael y gydnabyddiaeth a'r wobr hon gan Adeiladu Rhagoriaeth yng Nghymru.

 

Mae Canolfan Pentre Awel yn ddatblygiad arloesol sy’n werth miliynau o bunnoedd a fydd yn dod ag arloesi ym maes gwyddor bywyd a busnes, gofal iechyd cymunedol a chyfleusterau hamdden modern ynghyd ar safle 83 erw Llynnoedd Delta ar arfordir Llanelli. Mae'n cael ei ariannu'n rhannol gan Fargen Ddinesig Bae Abertawe (£40miliwn), ac ef yw’r cynllun adfywio mwyaf yn ne-orllewin Cymru.

 

Ychwanegodd  Aelod Cabinet Cyngor Sir Gâr dros Adfywio, Hamdden, Diwylliant a Thwristiaeth, y Cynghorydd Hazel Evans:

Mae'r wobr hon ffordd wych o gydnabod yr effaith drawsnewidiol y mae Canolfan Pentre Awel eisoes yn ei chael yn Sir Gaerfyrddin. Mae'n adlewyrchu'r bartneriaeth gref rhwng Bouygues UK, y Cyngor Sir a'n rhanddeiliaid ehangach i gyflawni prosiect sy'n creu gwerth economaidd i'n cymunedau lleol. Hoffwn i fanteisio ar y cyfle hwn i longyfarch pawb sy'n ymwneud â'r prosiect wrth iddo gyrraedd y garreg filltir hon.