Pobl ifanc yn cymryd yr awenau yng Nghyfarfod Cyffredinol Blynyddol

Daeth pobl ifanc o bob rhan o Sir Gaerfyrddin at ei gilydd ar 10 Ebrill yn Neuadd y Sir ar gyfer Cyfarfod Cyffredinol Blynyddol Cyngor Ieuenctid Sir Gaerfyrddin.

Rhoddodd y cyfarfod gyfle i rannu cyflawniadau'r Cyngor Ieuenctid dros y flwyddyn ddiwethaf gydag Aelodau Etholedig y Cyngor Sir, Rheolwyr a Phenaethiaid Gwasanaeth yn yr adran Addysg a Gwasanaethau Plant.

Ymhlith uchafbwyntiau'r flwyddyn ddiwethaf oedd lansio prosiect cam-drin domestig Codi Llais yn erbyn Trais ac Ein Llais, a ddaeth â dysgu bywyd go iawn i ysgolion. Cafodd Evie Somers glod hefyd am gynrychioli Cymru yn Senedd Ieuenctid y DU.

Agorodd Owain Lloyd, Cyfarwyddwr Addysg a Phlant, y cyfarfod yn swyddogol, ac yna siaradodd y Cynghorydd Aled Vaughan Owen am y cydweithrediad parhaus rhwng Bwrdd Gweithredol Cyngor Sir Caerfyrddin a'r Cyngor Ieuenctid. Daeth y Cynghorydd Carys Jones â'r Cyfarfod Cyffredinol Blynyddol i ben drwy dynnu sylw at bwysigrwydd parhau i godi materion pobl ifanc ar lefel leol ac ar lefel genedlaethol.

Arweiniodd y cadeirydd ymadawol Magda Smith, 18 oed, y cyfarfod a myfyriodd ar ei hamser gyda'r Cyngor Ieuenctid:

Rwy'n teimlo'n falch iawn o'r hyn rydyn ni wedi'i gyflawni gyda'n gilydd. Rydw i wedi tyfu nid yn unig fel arweinydd ond hefyd fel person. Yn bwysicaf oll, rwy'n gobeithio fy mod wedi gwneud gwahaniaeth trwy helpu pobl ifanc i deimlo eu bod yn cael eu clywed, eu grymuso a'u hysbrydoli i greu newid.”

Ar ôl y Cyfarfod Cyffredinol Blynyddol cyhoeddwyd Bwrdd Gweithredol newydd y Cyngor Ieuenctid ar gyfer 2025:

• Toby Bithray - Cadeirydd
• Ben Bantock – Is-gadeirydd
• Evie Somers – Ysgrifennydd
• Samuel Kwan – Trysorydd
• Zach Davis – Swyddog Cyfathrebu

Dywedodd y Cynghorydd Glynog Davies, Aelod Cabinet Cyngor Sir Caerfyrddin dros Addysg a'r Gymraeg:

Mae gweithio ochr yn ochr â'r Cyngor Ieuenctid yn helpu i sicrhau bod lleisiau pobl ifanc yn cael eu clywed ac yn cael dylanwad wrth lunio dyfodol Sir Gaerfyrddin. Eu syniadau, eu hegni, a'u penderfyniadau i wneud gwahaniaeth yw'r union beth sydd ei angen arnom mewn llywodraeth leol a byddwn yn parhau i gryfhau'r bartneriaeth hon i helpu i lunio dyfodol mwy disglair i bawb."

Os hoffech ragor o wybodaeth neu os oes gennych ddiddordeb mewn ymuno â Chyngor Ieuenctid Sir Gaerfyrddin, ewch i Gyngor Ieuenctid Sir Gaerfyrddin - Ieuenctid Sir Gâr.