Ciosg ar gael i'w osod yng nghanol tref Caerfyrddin

Mae Cyngor Sir Caerfyrddin yn cynnig cyfle i fusnes neu entrepreneur brydlesu ciosg 3 ar Heol y Capel, Caerfyrddin, tan ddiwedd Mehefin 2026.

Mae'r ciosg yn mesur tua 10 metr sgwâr ac mae'n dod â chyflenwad trydanol wedi'i ffitio. Mae'n cynnwys ffrynt gwydr gyda chaead diogelwch i roi amddiffyniad ychwanegol. Y rhent ar gyfer yr uned yw £30 yr wythnos.

Mae'r gofod manwerthu yn addas ar gyfer amrywiaeth o ddefnyddiau, ac anogir entrepreneuriaid gyda busnesau newydd i wneud cais, yn ogystal â manwerthwyr annibynnol â rhywbeth unigryw i gynnig sy'n ategu'r hyn sydd eisoes ar gael yn y dref.

Dywedodd y Cynghorydd Carys Jones, Aelod Cabinet Cyngor Sir Caerfyrddin dros Faterion Gwledig, Cydlyniant Cymunedol a Pholisi Cynllunio:

Rydym yn gyffrous i gynnig y ciosg hwn yng nghanol tref Caerfyrddin. Mae hwn yn gyfle gwych i entrepreneuriaid arloesol a manwerthwyr annibynnol sefydlu busnes mewn ardal brysur, gan gyfrannu at dirwedd fanwerthu amrywiol y dref tra'n elwa o gymuned gefnogol.

Mae modd cael rhagor o wybodaeth a ffurflenni cais drwy anfon neges e-bost i Markets@sirgar.gov.uk. Mae ceisiadau'n cau am 12:00pm ar 2 Mai 2025.