Y Cyngor yn erlyn bridwyr cŵn heb drwydded

Mae tri bridiwr cŵn heb drwydded wedi cael eu herlyn gan Gyngor Sir Caerfyrddin. Cafwyd Donna Edwards, William Edwards ac Elysia Jones o Fyngalo Gelligaeros, Cwm-ffrwd yn euog o weithgarwch bridio cŵn heb drwydded yn Llys y Goron Abertawe ar 10 Chwefror 2025.

Roedd Donna Edwards a'i phartner, Mark Thomas, wedi bod yn ddeiliaid trwydded lletya cŵn yn Gelligaeros ers blynyddoedd lawer cyn penderfynu rhoi'r gorau i letya cŵn a defnyddio'u cynelau lletya fel cynelau bridio ym mis Hydref 2020.

Roedd Donna Edwards wedi hysbysu'r Cyngor bod 19 o gŵn yn cael eu cadw yn yr eiddo. Er bod y Cyngor wedi gwneud ymholiadau ynghylch trwydded bridio cŵn ar sawl achlysur ac wedi rhoi rhybuddion am fridio heb drwydded, ni ddaeth cais am drwydded bridio byth i law gan y diffynyddion.

Ym mis Ebrill 2021, cysylltodd Pets4homes â Chyngor Sir Caerfyrddin i ddweud eu bod wedi blocio tri chyfrif yn enwau Donna Edwards, William Edwards ac Elysia Jones, a oedd i gyd yn hysbysebu bod cŵn bach ar werth ym Myngalo Gelligaeros, Cwm-ffrwd. Ar ôl gofyn am wybodaeth gan Pets4Homes am nifer y toreidiau a hysbysebwyd gan Gelligaeros, canfuwyd bod 8 torraid wedi'u hysbysebu yn Gelligaeros rhwng Mehefin 2020 a Mawrth 2021.

Ar ôl dwyn erlyniad llwyddiannus, aeth Cyngor Sir Caerfyrddin â chyfanswm o £81,509.93 oddi wrth y tri diffynnydd, drwy gyfrwng enillion troseddau.

Dedfrydwyd Donna Edwards i Orchymyn Cymunedol 12 mis a 70 awr o waith di-dâl a gorchmynnwyd iddi dalu £85 o ordal dioddefwr.

Cafodd Williams Edwards Orchymyn Cymunedol 12 mis a 50 awr o waith di-dâl a gorchmynnwyd iddo dalu £85 o ordal dioddefwr.

Cafodd Elysia Jones ei rhyddhau'n amodol am 12 mis a bydd rhaid iddi dalu £20 o ordal dioddefwr.

Dywedodd y Cynghorydd Aled Vaughan Owen, yr Aelod Cabinet dros Newid Hinsawdd, Datgarboneiddio a Chynaliadwyedd:

Hoffwn fanteisio ar y cyfle hwn i ddiolch i dîm Iechyd Anifeiliaid y Cyngor am fynd ar drywydd yr achos hwn a dod â'r bridwyr cŵn hyn, a oedd yn gweithredu'n anghyfreithlon, gerbron llys. 

Gadewch i hyn fod yn rhybudd i fridwyr cŵn eraill heb drwydded y byddwn yn dod ar eich ôl os byddwch yn parhau i anwybyddu'r gyfraith.” 

I gael rhagor o wybodaeth am waith Cyngor Sir Caerfyrddin o ran gorfodi iechyd anifeiliaid, ewch i Lles Anifeiliaid - Cyngor Sir Caerfyrddin