Bouygues UK yn cyflawni sero net ar safle prosiect Pentre Awel

Mae'r prif gontractwr Bouygues UK, sy'n adeiladu Parth 1 datblygiad Pentre Awel yn Llanelli, sy’n dwyn yr enw 'Canolfan', wedi gweithio gydag is-gontractwyr a'i gadwyn gyflenwi yn ystod y gwaith adeiladu sy’n para 24 mis i gyflawni sero net ar y prosiect adeiladu. Mae hyn yn cynnwys gostyngiad o fwy na 90% ar allyriadau uniongyrchol o'r holl danwydd ar y safle, yn ogystal â gostyngiad o 10% mewn cynhyrchu gwastraff, a’r defnydd o ynni a dŵr. Ers dechrau'r prosiect, mae dros 450 tunnell o allyriadau carbon wedi cael eu harbed diolch i'r fenter hon.

 

Mae’r prosiect wedi cyrraedd y garreg filltir ganolog hon o fod yn sero net o ganlyniad i roi mentrau ynni, gwastraff ac arbed adnoddau ar waith, gan gynnwys mabwysiadu olew llysiau wedi’i hydrodrin (HVO) sydd wedi'i ardystio'n gynaliadwy fel tanwydd, yn ogystal â defnyddio deunyddiau gwyrdd a rhai sydd wedi’u hailgylchu. 

 

Oherwydd y gostyngiad mewn allyriadau yn sgil defnyddio HVO ym Mhentre Awel, mae Bouygues UK wedi ymrwymo i ddefnyddio HVO i bweru ei holl safleoedd adeiladu ledled y DU. Mae’r tanwydd HVO a gafaelwyd ganddo wedi cael ardystiad ISCC oherwydd ei gadwyn gyflenwi y gellir ei olrhain nad yw’n cynnwys datgoedwigo. Mae'r partneriaid yn cynnwys Green4Wales, Watson Fuels, New Era a CSS.

 

Mae tîm prosiect Canolfan Pentre Awel wedi gweithio'n ddiflino yn ystod eu cyfnod dwy flynedd bron ar y safle, i roi lleihau carbon wrth wraidd y datblygiad. Mae wedi targedu 24 o fentrau penodol i helpu i leihau allyriadau, gwastraff ac ynni ar y prosiect. 

 

Yng nghamau cynnar y datblygiad, gosodwyd swyddfeydd y safle a chabanau sy’n defnyddio ynni’r haul ar y safle, a phan nad oedd yr haul yn eu pweru, roedd yr adeiladau hynny'n defnyddio generadur pŵer HVO. Roedd camerâu cylch cyfyng y safle hefyd yn cael eu pweru gan ynni’r haul. Cymaint oedd llwyddiant y generadur HVO, fel y cafodd y safle cyfan ei drawsnewid i HVO yng nghamau cynnar y prosiect. 

 

Mae mentrau eraill megis gweithio'n agos gyda'i gadwyn gyflenwi i ddod o hyd i ddeunyddiau adeiladu wedi'u hailgylchu hefyd wedi cyfrannu at daith sero net ehangach y prosiect. Mae deunyddiau o'r fath yn cynnwys defnyddio bariau wedi'u hatgyfnerthu ar gyfer sylfeini'r adeiladau sy'n cynnwys 98% o gynnwys wedi’i ailgylchu, tra bod y dur strwythurol yn cynnwys 80% o gynnwys wedi'i ailgylchu. 

 

Wrth gloddio i osod y sylfeini, aethpwyd â phridd o wyneb y safle hefyd i gyfleuster ailgylchu lleol lle cafodd y deunydd ei wahanu, ei drin a'i ailddefnyddio - gan leihau faint o wastraff a oedd yn mynd i safleoedd tirlenwi.

 

Mae'r tîm wedi creu partneriaeth gyda Gaia, cwmni o Sir Gaerfyrddin sy'n helpu i nodi, monitro a lleihau'r defnydd o bŵer, gan ddefnyddio deallusrwydd artiffisial ac ystod o synwyryddion. Hyd yma, gwnaed arbedion ynni o 47.9% o ganlyniad i ddefnyddio Gaia.  Mae'r prosiect hefyd yn cael budd ymgynghorydd carbon sy'n rhoi cyngor ar nodi atebion carbon isel drwy gydol y cyfnod adeiladu ac yn monitro carbon, gwastraff a danfoniadau, yn ogystal ag uwchsgilio'r gweithlu ar bynciau yn ymwneud â’r hinsawdd a’r amgylchedd.

 

Mae Canolfan Pentre Awel yn ddatblygiad arloesol sy’n werth miliynau o bunnoedd a fydd yn dod ag arloesi ym maes gwyddor bywyd a busnes, gofal iechyd cymunedol a chyfleusterau hamdden modern ynghyd ar safle 83 erw Llynnoedd Delta ar arfordir Llanelli. Mae'n cael ei ariannu'n rhannol gan Fargen Ddinesig Bae Abertawe (£40 miliwn) ac ef yw’r cynllun adfywio mwyaf yn ne-orllewin Cymru.

 

Meddai Peter Sharpe, Cyfarwyddwr Prosiect Pentre Awel, am gyflawni sero net:

Rydym yn hynod falch o'r cyflawniad hwn. Yn ogystal ag adeiladu cyfleuster arloesol o'r radd flaenaf, fel tîm prosiect, gwnaethom osod ein bryd ar leihau cynifer o'n hallyriadau carbon â phosib. Gwnaethom lunio cynllun ac rwyf mor falch o ddweud ein bod wedi ei gyflawni. 

Ni fyddai hyn wedi digwydd oni bai am benderfyniad a chefnogaeth nid yn unig staff Bouygues UK yma ym Mhentre Awel, ond hefyd ein his-gontractwyr anhygoel a'n partneriaid yn y gadwyn gyflenwi a ddaeth gyda ni ar y daith sero net hon.

Meddai Phillipe Bernard, Cadeirydd a Phrif Swyddog Gweithredol Bouygues UK: 

Rwy'n canmol ymdrechion tîm y prosiect i leihau allyriadau carbon yn sylweddol ym mhrosiect Pentre Awel. Mae hyn yn dangos bod cyflawni adeiladu cynaliadwy yn bosib.

Rydym yn falch iawn, oherwydd y llwyddiant a gyflawnwyd gyda'r defnydd o HVO ym Mhentre Awel, ein bod bellach yn mandadu'r defnydd o HVO sydd wedi'i ardystio'n gynaliadwy ym mhob un o'n safleoedd ledled y DU.

Ychwanegodd Aelod Cabinet Cyngor Sir Gâr dros Adfywio, Hamdden, Diwylliant a Thwristiaeth, y Cynghorydd Hazel Evans:

Mae'r Cyngor wedi ymrwymo'n ddwfn i fynd i'r afael â newid yn yr hinsawdd, ac rydym yn cydnabod ein bod yn gyfrifol am leihau ein hallyriadau nwyon tŷ gwydr ein hunain ac annog trigolion Sir Gaerfyrddin i fod yn ymwybodol o'u hôl troed carbon eu hunain. Mae'n galonogol gweld bod y datblygiad hwn gan y Cyngor yn mynd i'r afael ag allyriadau carbon yn uniongyrchol ac yn arwain drwy osod esiampl ar gyfer datblygiadau yn y dyfodol i flaenoriaethu ein hamgylchedd. Hoffwn fanteisio ar y cyfle hwn i ddiolch i'r tîm yn Bouygues UK am eu hymrwymiad wrth i ni gyrraedd y garreg filltir aruthrol hon.