Ymgynghoriad Cyhoeddus ar Liniaru Llifogydd - Cydweli
197 diwrnod yn ôl
Mae prosiect a gefnogir gan Lywodraeth Cymru yn mynd rhagddo ar hyn o bryd i ymchwilio i'r perygl o lifogydd nawr ac yng Nghydweli. Mae'r prosiect hefyd yn asesu opsiynau lliniaru llifogydd posibl i leihau'r perygl o lifogydd i drigolion yr ardal ac ymchwilio i ddulliau cyllido yn y dyfodol ar gyfer y cynllun.
Mae Cyngor Sir Caerfyrddin yn trefnu digwyddiad ymgynghori wyneb yn wyneb gyda thrigolion, busnesau a rhanddeiliaid. Bydd hyn yn rhoi cyfle i'r cyhoedd gyfarfod a siarad â chynrychiolwyr o'r Cyngor a'r Tîm Prosiect.
Bydd y digwyddiad ymgynghori yn cael ei gynnal ym Mhrif Neuadd Canolfan Tywysoges Gwenllian, Highfield Villas ddydd Mawrth, 27 Chwefror, rhwng 3:30pm a 7pm. Bydd swyddogion o Gyngor Sir Caerfyrddin a WSP Consultants yn bresennol ac ar gael drwy gydol y digwyddiad i ateb unrhyw ymholiadau gan y cyhoedd.
Mae tîm y prosiect am ddeall yr effaith y mae llifogydd yn ei chael ar gymunedau, sut y mae'r llifogydd yn digwydd yng Nghydweli, ac asesu gwahanol fesurau atal llifogydd posibl a fydd yn lleihau'r effaith yn ystod tywydd cynyddol stormus yn y dyfodol.
Bydd aelodau'r cyhoedd yn gallu cyflwyno eu sylwadau a'u hadborth yn bersonol i'r Tîm Prosiect ar y diwrnod. Byddant hefyd yn cael eu gwahodd i gyflwyno sylwadau ac adborth trwy e-bost ar ôl y digwyddiad.
Bydd adborth o'r digwyddiad yn bwydo i mewn i'r cam nesaf o'r gwaith ac yn ffurfio rhan o unrhyw benderfyniadau y bydd Cyngor Sir Caerfyrddin a Llywodraeth Cymru yn eu gwneud i ddylunio a gweithredu unrhyw gynllun i leihau'r perygl o lifogydd.
Dywedodd y Cynghorydd Edward Thomas, Aelod Cabinet dros Wasanaethau Trafnidiaeth, Gwastraff a Seilwaith, Cyngor Sir Caerfyrddin:
Mae mynd i'r afael â llifogydd lleol yn golygu cael mewnbwn y gymuned leol a byddwn yn annog cynifer o drigolion â phosibl i ddweud eu dweud am y datblygiad o’r opsiynau.