Bwrdd Partneriaeth Rhanbarthol Gorllewin Cymru yn dathlu rhagoriaeth  iechyd a gofal cymdeithasol

Cynhaliwyd Seremoni Wobrwyo gyntaf Bwrdd Partneriaeth Rhanbarthol Gorllewin Cymru yng Nghanolfan Halliwell yng Nghaerfyrddin ar 6 Rhagfyr i ddathlu'r hyn a gyflawnwyd gan staff iechyd a gofal cymdeithasol ar draws Gorllewin Cymru yn y flwyddyn ddiwethaf.

Roedd y seremoni'n gyfle i ddod ynghyd a dangos arloesedd, ymroddiad a rhagoriaeth y gweithlu iechyd a gofal cymdeithasol.

Cyflwynwyd y seremoni gan Judith Hardisty, Cadeirydd y Bwrdd Partneriaeth Rhanbarthol, a ddywedodd;

"Eleni, mae pandemig Covid-19 wedi parhau i effeithio ar lawer o wasanaethau a staff. Mae'r heriau i staff ar draws iechyd a gofal cymdeithasol wedi bod yn sylweddol wrth iddyn nhw barhau i reoli'r gofynion cynyddol ar wasanaethau ar adeg o ansicrwydd mawr i gymunedau lleol. Fel Bwrdd Partneriaeth Rhanbarthol rydym yn hynod falch o'r staff ym mhob elfen o'r maes iechyd a gofal cymdeithasol yng Ngorllewin Cymru, sydd wedi dal ati i fynd yr ail filltir.

"Dyma seremoni wobrwyo gyntaf y Bwrdd Partneriaeth Rhanbarthol, ac mae'n rhoi cyfle i ni ddiolch i staff am eu gwaith anhygoel a dathlu eu llwyddiant. Mae'r Bwrdd Partneriaeth Rhanbarthol yn gweithio ar sail cydweithredu, arloesi, integreiddio a chyd-gynhyrchu. Rwy'n falch iawn bod ein gwobrau yn cydnabod llwyddiannau eithriadol yn y meysydd hyn yn ogystal â chefnogi ein gweithlu."

Daeth dros 60 o gynrychiolwyr i'r seremoni, gan gynnwys y rhai gyrhaeddodd y rownd derfynol, er mwyn rhannu'r pethau gwych roedden nhw wedi eu cyflawni gyda chydweithwyr.  Gwahoddwyd enwebiadau gan bawb sy'n rhan o'r sector iechyd a gofal cymdeithasol yng Ngorllewin Cymru, gan gynnwys timau, grwpiau neu sefydliadau yn y cymunedau cyhoeddus, preifat, gwirfoddol neu gydweithredol. 

 

Enillydd y 6 chategori a'r rhai gafodd ganmoliaeth am gyrraedd y rownd derfynol oedd:

 

• Gwobr trawsnewid drwy arloesedd

Enillydd - Cyfleoedd dydd - Cydlynu Ardal Leol

Canmoliaeth Uchel - Helpu ein Poblogaeth Hŷn i Aros yn Iach Gartref a Camu 'Mlaen

 

• Gwobr Cefnogi a buddsoddi yn llesiant y gweithlu iechyd a gofal cymdeithasol

Enillydd – Ymyriadau Iechyd a Llesiant y Gweithlu Gofal Cymdeithasol

• Gwobr Gofal Integredig

Enillydd - Gwasanaeth Galluogi a Gofal a Dargedir Integredig

• Gwobr i Dîm

Enillydd - Gweithio drwy'r pandemig COVID-19 - Paul Sartori

Canmoliaeth Uchel - Tîm Cyflogaeth â Chymorth Sir Benfro a Chymorth Ymddygiadol Cadarnhaol, Gwasanaeth Seibiant Tir Einon

• Gwobr Cynnwys Defnyddwyr

Enillydd - Hyrwyddwyr Anableddau Dysgu Cyngor Sir Penfro

Canmoliaeth Uchel - Grŵp Gwella Bywydau Rhanbarthol - Dream Team

• Gwobr am Gyflawniad Eithriadol

Mark Evans, Cyngor Sir Caerfyrddin

Roedd y gwobrau hefyd yn cydnabod ac yn dathlu'r holl staff comisiynu rhanbarthol a oedd wedi cyflawni tystysgrif achrededig lefel 7 mewn comisiynu.

Perfformiodd Côr Cysur (Cradle Choir) nifer o ganeuon yn y digwyddiad, gydag aelodau'r côr yn teithio o Aberdaugleddau a Llandeilo. Cafodd Côr Cysur ei greu gan Opera Cenedlaethol Cymru i annog pobl sy'n byw gyda dementia, eu teuluoedd a'u gofalwyr i fynychu sesiynau wythnosol am ddim, lle maent yn canu caneuon amrywiol gyda'r nod o fwynhau profiad cadarnhaol gyda'i gilydd trwy gerddoriaeth. Roedd pawb yno wrth eu bodd â chanu a pherfformiad y côr.

Rhoddodd Seremoni Wobrwyo Bwrdd Partneriaeth Rhanbarthol Gorllewin Cymru 2022 gydnabyddiaeth a chanmoliaeth haeddiannol i'r rhai sy'n gweithio yn y sector iechyd a gofal cymdeithasol, gan gydnabod ar yr un pryd y gwaith rhagorol sydd wedi bod yn digwydd ar draws Gorllewin Cymru.

Dywedodd y Cynghorydd Jane Tremlett, Aelod Cabinet Cyngor Sir Caerfyrddin dros Iechyd a Gwasanaethau Cymdeithasol;

"Hoffwn longyfarch pawb sydd wedi cyrraedd y rownd derfynol am eu gwaith gwych yn y sector iechyd a gofal cymdeithasol.

Fel Cyngor, rydym yn ddiolchgar i holl weithwyr y sector am eu gwaith caled ac rwy'n falch o weld y gwobrau yma'n cydnabod hynny."